قازاقستاندا تاس جولداردا جىلدامدىقتى اسىرۋعا قاتە جازىلعان ايىپپۇلدار انىقتالدى. infohub.kz سايتىنىڭ حابارلاۋىنشا، ىشكى ىستەر مينيسترلىگى مۇنداي قاۋلىلاردىڭ بارلىعى اۆتوماتتى تۇردە جويىلاتىنىن، ال تولەنگەن سومالاردى قايتارۋ تەتىگى ازىرلەنىپ جاتقانىن مالىمدەدى.
تەحنيكالىق اقاۋ باس پروكۋراتۋرانىڭ «ەراپ» اقپاراتتىق جۇيەسىندە 13-14 تامىز ارالىعىندا ورىن الدى. قاتەلىك سالدارىنان ورتاشا جىلدامدىقتى بۇزۋدىڭ ءبىر بولىگى لەزدىك جىلدامدىقتى اسىرۋ رەتىندە قاتە تىركەلگەن.
ءىىم اكىمشىلىك پوليسيا كوميتەتىنىڭ ءتوراعاسى مۇرات قابدەنوۆ: «ناتيجەسىندە ورتاشا جىلدامدىقتى بۇزۋدىڭ ءبىر بولىگى لەزدىك جىلدامدىقتى اسىرۋ رەتىندە قاتە تىركەلدى»، — دەپ ءتۇسىندىردى.
ۆەدومستۆو جۇرگىزۋشىلەرگە پوليسياعا جۇگىنۋدىڭ نەمەسە ايىپپۇلدىڭ قاتە ەكەنىن ءوز بەتىنشە دالەلدەۋدىڭ قاجەتى جوق ەكەنىن اتاپ ءوتتى. «بارلىق قاتە قالىپتاسقان قاۋلىلار انىقتالىپ، اۆتوماتتى تۇردە جويىلادى»، — دەدى قابدەنوۆ.
بۇل تەك اتالعان تەحنيكالىق اقاۋ سالدارىنان پايدا بولعان قاۋلىلارعا قاتىستى ەكەنى ايتىلادى. ونىڭ سالدارىن جويۋ جۇمىستارى جالعاسۋدا.
مۇنداي ايىپپۇلداردى تولەپ ۇلگەرگەندەرگە اقشانى قايتارۋ ۋادە ەتىلدى. «ءقازىر تولەنگەن قاراجاتتى قايتارۋ تەتىگى ازىرلەنىپ جاتىر. جاعداي باقىلاۋدا»، — دەپ قورىتىندىلادى كوميتەت ءتوراعاسى.