قازاقستاندا ەۋرازيالىق ەكونوميكالىق وداق ەلدەرىنەن اكەلىنگەن اۆتوكولىكتەردىڭ يەلەرىنە ۋاقىتشا تىركەۋ مەرزىمىنىڭ اياقتالاتىنى ەسكەرتىلدى. العاشقى بەسجىلدىق تىركەۋ مەرزىمدەرى ءقازىردىڭ وزىندە اياقتالا باستادى، دەپ حابارلايدى infohub.kz سايتى.
الماتى وبلىسى پوليسيا دەپارتامەنتى اۆتوكولىك يەلەرىنە تىركەۋ مەرزىمى مەن قۇجاتتاردى الدىن الا تەكسەرۋدى ۇسىندى. ەگەر ۋاقىتشا تىركەۋ مەرزىمى اياقتالىپ قالسا، ازاماتتاردان ماسەلەنى كەيىنگە قالدىرماي، كولىكتى ودان ءارى پايدالانۋ ءتارتىبىن الدىن الا ناقتىلاۋ سۇرالادى.
پوليسەيلەر اۆتوكولىكتى پايدالانۋ قازاقستان زاڭناماسىنىڭ تالاپتارىنا سايكەس بولۋى كەرەكتىگىن دە ەسكە سالدى.
ۋاقىتشا تىركەۋ باعدارلاماسى 2023 جىلدىڭ شىلدەسىندە باستالعان بولاتىن. ول قازاقستانعا 2022 جىلدىڭ 1 قىركۇيەگىنە دەيىن اكەلىنگەن، ءبىراق بۇرىنعى تىركەلگەن ەلىندە ەسەپتەن شىعارىلماعاندىقتان نەمەسە وزگە دە شەكتەۋلەرگە بايلانىستى زاڭداستىرىلماعان اۆتوكولىكتەرگە قولدانىلدى.
مۇنداي يەلەرگە بەس جىل مەرزىمگە ۋاقىتشا ەسەپكە قويۋعا رۇقسات بەرىلدى، وسى ۋاقىت ىشىندە ولار كولىكتىڭ قۇقىقتىق مارتەبەسىن رەتتەي الادى. ۋاقىتشا تىركەۋ رەسىمدەلگەن كەزدە كۋالىككە «يەلەنۋ قۇقىعىنسىز جانە ق ر شەگىنەن شىعۋ قۇقىعىنسىز» دەگەن بەلگى قويىلدى. شەتەلدىك مەملەكەتتىك نومىرلەر مەن تىركەۋ قۇجاتتارى «ازاماتتارعا ارنالعان ۇكىمەت» مەملەكەتتىك كورپوراسياسىنا ساقتاۋعا تاپسىرىلدى.
بەس جىلدىق مەرزىم اياقتالعان سوڭ ۋاقىتشا تىركەۋ اۆتوماتتى تۇردە توقتاتىلادى. بۇل شارا قازاقستاندا 2023 جىلدىڭ 23 قاڭتارى مەن 1 شىلدەسى ارالىعىندا وتكەن شەتەلدىك اۆتوكولىكتەردى زاڭداستىرۋ ناۋقانىنىڭ جالعاسى بولدى.
بۇعان دەيىن تۇركىستان وبلىسىندا تىركەۋسىز اۆتوكولىكتەر انىقتالىپ جاتقانى حابارلانعان بولاتىن.