قازاقستاندا قىلمىستىڭ الدىن الۋدىڭ ەرتە جۇيەسىنە كوشۋ ارقىلى قوعامدىق احۋال جاقسارىپ، جالپى قىلمىس دەڭگەيى ءبىرىنشى جارتىجىلدىق قورىتىندىسى بويىنشا 11%-عا تومەندەدى، دەپ حابارلايدى infohub.kz سايتى.
بۇل تۋرالى ق ر باس پروكۋرورى بەرىك اسىلوۆ مالىمدەدى. ونىڭ ايتۋىنشا، قۇقىقتىق رەفورما اياسىندا قۇقىق قورعاۋ ورگاندارى سالدارعا جاۋاپ بەرۋدەن قاۋىپ-قاتەردى بولجاۋعا كوشۋدە. ول ءۇشىن ەلدە قىلمىستىق قاۋىپتەر مەن تاۋەكەلدەردى بولجاۋ ورتالىعى قۇرىلدى، ول تاۋلىك بويى كريمينوگەندىك احۋالدى تالداپ، ءقاۋىپتى ايماقتاردى انىقتاپ، شەتەلدىك كونتەنتتى باقىلايدى.
جاساندى ينتەللەكت پەن ۇشقىشسىز اپپاراتتاردى قولدانا وتىرىپ، پروكۋرورلار ءىىم جانە اكىمدىكتەرمەن بىرلەسىپ، ەل بويىنشا 360-تان استام الەۋەتتى ءقاۋىپتى نىساندى انىقتادى. بۇل جەرلەردە پوليسيا ءپاترۋلىن كۇشەيتىپ، 4 مىڭعا جۋىق جاڭا جارىقتاندىرۋ نۇكتەسى مەن 3،5 مىڭنان استام بەينەباقىلاۋ كامەراسىن ورناتتى. ناتيجەسىندە ءبىرىنشى جارتىجىلدىقتا رەسپۋبليكادا كىسى ءولتىرۋ، قاراقشىلىق، توناۋ، بوپسالاۋ، ۇرلىق جانە كوشەدەگى قۇقىق بۇزۋشىلىقتار سانى ازايدى.
ەسىرتكى قىلمىسىنا قارسى شابۋىل جۇمىستارى جالعاسۋدا. «كيبەرقاداعالاۋ» جۇيەسى ەسىرتكى ناسيحاتتايتىن 10 مىڭ ماتەريالدى، ونىڭ ىشىندە 6 مىڭنان استام ەسىرتكى دۇكەنىن بۇعاتتادى. سونىمەن قاتار، پروكۋراتۋرا مەن پوليسيا 464 مىڭنان استام دروپپەر شوتىن بۇعاتتاپ، ەسىرتكى ساتۋدان تۇسكەن زاڭسىز كىرىستەردى 2،6 ملرد تەڭگەدەن استام سوماعا تاركىلەدى.
سوڭعى جىلدارى العاش رەت قازاقستاندا ينتەرنەت-الاياقتىقتىڭ ءوسۋ ءۇردىسىن توقتاتۋ مۇمكىن بولدى — ولاردىڭ سانى 9%-عا تومەندەدى. قۇقىق قورعاۋ ورگاندارى «قازاقتەلەكوم» كومپانياسىمەن بىرلەسىپ، 1 ملن-نان استام كۇدىكتى قوڭىراۋدى ۇستاپ، 12 شەتەلدىك سكام-كولل-ورتالىعىنىڭ جۇمىسىن توقتاتتى. اتاپ ايتقاندا، ەلوردالىق انتيكولل-ورتالىق 76 جاستاعى زەينەتكەردى الداۋدىڭ الدىن الدى، ول الاياقتارعا 21 ملن تەڭگە بەرمەك بولعان. سونىمەن قاتار، ۇلتتىق بانكتىڭ انتيفرود-ورتالىعى ارقىلى 2،9 ملرد تەڭگەدەن استام سوماعا الاياقتىق ترانزاكسيالار بۇعاتتالدى.
باس پروكۋرور ۆەدومستۆونىڭ باستى ماقساتى — قاۋىپتەردى الدىن الا انىقتاپ، پرەزيدەنت قاسىم-جومارت توقايەۆ قويعان «زاڭ جانە ءتارتىپ» قاعيداتىن ىسكە اسىرۋ اياسىندا سالداردىڭ الدىن الۋ ەكەنىن اتاپ ءوتتى.