قازاقستاننىڭ وقۋ-اعارتۋ مينيسترلىگى مەكتەپ وقۋشىلارىنىڭ سمارتفون قولدانۋ ەرەجەلەرىن بەكىتەتىن بۇيرىق قابىلدادى: ۇيالى بايلانىس قۇرىلعىسىن تەك پەداگوگتىڭ رۇقساتىمەن عانا پايدالانۋعا بولادى، دەپ حابارلايدى infohub.kz سايتى.
قازاقستان رەسپۋبليكاسىنىڭ نورماتيۆتىك قۇقىقتىق اكتىلەرىنىڭ ەتالوندىق باقىلاۋ بانكىسىنىڭ سايتىندا ورتا ءبىلىم بەرۋ ۇيىمدارىندا تەلەفون قولدانۋدىڭ بارلىق ەرەجەلەرى جازىلعان وقۋ-اعارتۋ ءمينيسترىنىڭ بۇيرىعى جاريالاندى.
قۇجاتقا سايكەس، وقۋ ساباعى كەزىندە ۇيالى بايلانىس قۇرىلعىسى پايدالانىلمايدى، الايدا ءبىرقاتار ەرەكشەلىكتەر قاراستىرىلعان. اتاپ ايتقاندا، تەلەفوندى وقۋ ماقساتىندا پەداگوگتىڭ نۇسقاۋىمەن، وقۋ تاپسىرماسىن ورىنداۋ ءۇشىن قاجەت بولعاندا؛ ءبىلىم الۋشىنىڭ، تاربيەلەنۋشىنىڭ نەمەسە وزگە ادامداردىڭ ومىرىنە جانە (نەمەسە) دەنساۋلىعىنا ءقاۋىپ توندىرەتىن جاعدايلار تۋىنداعاندا؛ ءبىلىم الۋشىنىڭ نەمەسە تاربيەلەنۋشىنىڭ دەنساۋلىق جاعدايىنا بايلانىستى ۇيالى بايلانىس قۇرىلعىسىن پايدالانۋ قاجەت بولعاندا قولدانۋعا جول بەرىلەدى.
بۇيرىقتا وقۋ ساباعى باستالعانعا دەيىن ءبىلىم الۋشى تەلەفوندى دىبىسسىز رەجيمگە قويىپ، دىرىلدەۋ مەن دىبىستىق سيگنالداردى وشىرەتىنى نە ونى وشىرەتىنى جازىلعان. سونىمەن قاتار مەكتەپتەر ۇيالى بايلانىس قۇرىلعىلارىن ورنالاستىرۋ ءۇشىن ارنايى جابدىقتالعان ورىنداردى ايقىنداي الادى.
ەگەر ساباق كەزىندە تەلەفون قاجەت بولسا، بۇيرىقتا ۇيالى بايلانىس قۇرىلعىسىن وقۋ ماقساتىندا پايدالانعاندا پەداگوگ ۇيالى بايلانىس قۇرىلعىسىن پايدالانۋدى قاجەت ەتەتىن وقۋ تاپسىرماسىن ايقىندايتىنى كورسەتىلگەن. ۇيالى بايلانىس قۇرىلعىسىن پايدالانۋ باستالعانعا دەيىن پەداگوگ ءبىلىم الۋشىلار مەن تاربيەلەنۋشىلەرگە وقۋ تاپسىرماسىنىڭ مازمۇنىن، ۇيالى بايلانىس قۇرىلعىسىن پايدالانۋ ءتارتىبى مەن ۇزاقتىعىن تۇسىندىرەدى. ول سونداي-اق وقۋ تاپسىرماسىن ءوز بەتىنشە ورىنداۋعا قويىلاتىن تالاپتاردى جانە ونى ورىنداۋ كەزىندە ۇيالى بايلانىس قۇرىلعىسىن پايدالانۋدىڭ جول بەرىلەتىن تاسىلدەرىن ءتۇسىندىرىپ، ۇيالى بايلانىس قۇرىلعىسىن پايدالانۋدى باستاۋ جانە توقتاتۋ تۋرالى نۇسقاۋ بەرەدى.
بۇل رەتتە وقۋشى سمارتفوندى تەك پەداگوگ ايقىنداعان وقۋ تاپسىرماسىن ورىنداۋ ءۇشىن عانا پايدالانۋى ءتيىس. تەلەفوننىڭ فوتو-، اۋديو- جانە بەينەجازبا فۋنكسيالارىن پايدالانۋ دا تەك پەداگوگتىڭ نۇسقاۋىمەن عانا جۇزەگە اسىرىلادى.
ءمينيستردىڭ بۇيرىعى 9 قازاندا كۇشىنە ەنەدى. بۇعان دەيىن پەداگوگ مارتەبەسى مەن ءبىلىم تۋرالى زاڭدارعا ەنگىزىلگەن تۇزەتۋلەر اياسىندا قازاقستان مەكتەپتەرىندە ۇيالى تەلەفونداردى پايدالانۋ ماسەلەسى قاراستىرىلعانى حابارلانعان. وقۋ-اعارتۋ ءمينيسترى جۇلدىز سۇلەيمەنوۆا قازاقستان مەكتەپتەرىندە سمارتفوندارعا تىيىم سالۋ جوسپارلارى تۋرالى تولىق ايتىپ بەرگەن ەدى.