Қазақстанда мемлекеттік қызметшілерге сыйлық беру және оны баланста ұстау ережелері өзгертілді. Тиісті үкімет қаулысы Қазақстан Республикасы нормативтік құқықтық актілерінің эталондық бақылау банкісінің сайтында электронды түрде жарияланды, деп хабарлайды infohub.kz сайты.
Жаңа құжат мемлекет меншігіне түскен мүлікті есепке алу, сақтау, бағалау және одан әрі пайдалану мәселелеріне қатысты. Онда, атап айтқанда, шенеуніктер мен олардың отбасы мүшелері протоколдық және басқа да ресми іс-шараларда алатын сыйлықтар туралы сөз қозғалады.
Қаулыға сәйкес, протоколдық немесе басқа да ресми іс-шара барысында адамға және (немесе) оның отбасы мүшелеріне берілген сыйлықты тегін алу үшін уәкілетті орган мүлікті мемлекеттік заңды тұлғаның балансына беру қажеттігі туралы қорытынды ұсынады. Хабарламада көрсетілгендей, қорытынды протоколдық немесе басқа да ресми іс-шара барысында адам уәкілетті органға тапсырған күннен бастап 10 жұмыс күнінен аспайтын мерзімде беріледі.
Сонымен қатар сыйлықты уәкілетті органға тапсырған адам жоғары тұрған лауазымды тұлғаны хабардар ете отырып, уәкілетті органмен жасалатын сатып алу-сату шартының негізінде оны сатып алуға құқылы. Бұл ретте сыйлық «Қазақстан Республикасындағы бағалау қызметі туралы» құжатта көрсетілген құн бойынша сатып алынуы мүмкін.
«Сыйлықты сатып алу уәкілетті орган мен сыйлықты тапсырған адам арасындағы сатып алу-сату шарты бойынша уәкілетті орган сыйлық алған адамнан хабарлама алған күннен бастап 7 күнтізбелік күн ішінде жүзеге асырылады», — делінген құжатта.
Тапсырылған сыйлықты беру уәкілетті орган мен сыйлықты тапсырған адам арасында қабылдау-тапсыру актісіне қол қою арқылы жүргізіледі.