2030 جىلدان باستاپ قازاقستاندا ازاماتتاردىڭ ءوز تۇرعىن ءۇيىن جىل سايىن ساقتاندىرۋى مىندەتتەلەدى. جاڭاشىلدىق پاتەر مەن ءۇي يەلەرىنە قاتىستى بولادى، ال ونى العاشقى بولىپ الماتى، شىمكەنت جانە جامبىل وبلىسىنىڭ تۇرعىندارى سەزىنەدى، دەپ حابارلايدى infohub.kz سايتى.
ءسوز جەر سىلكىنىسى، سۋ تاسقىنى، سەل جانە ورمان ورتتەرىنەن تۇرعىن ءۇيدى مىندەتتى ساقتاندىرۋدى ەنگىزۋ تۋرالى بولىپ وتىر. قورعانىس الۋ ءۇشىن مەنشىك يەلەرى تۇرعىن ءۇيدى مىندەتتى ساقتاندىرۋ قورىمەن شارت جاساسۋعا ءماجبۇر بولادى.
ساقتاندىرۋ قۇنى 0،5-تەن 5 ايلىق ەسەپتىك كورسەتكىشكە (اەك) دەيىن وزگەرۋى مۇمكىن. تولەم مولشەرى تابيعات اپاتىنان كەلگەن زالالعا تىكەلەي بايلانىستى: تۇرعىن ءۇي زاقىمدانسا — ساقتاندىرۋ سىيلىقاقىسى سوماسىنىڭ 250 ەسەلەنگەن مولشەرىندە، ال جويىلسا — 500 ەسەلەنگەن مولشەرىندە تولەنەدى.
«كرىشا» پورتالىنىڭ مالىمەتىنشە، تۇرعىن ءۇيدى مىندەتتى ساقتاندىرۋ 2030 جىلدان باستاپ، الدىمەن الماتى، شىمكەنت جانە جامبىل وبلىسىندا ىسكە قوسىلادى. كەيىن جۇيەنى تاعى 13 وڭىرگە تاراتۋ جوسپارلانىپ وتىر، جالپى العاندا ول قازاقستاننىڭ 16 قالاسى مەن وبلىسىن قامتيدى.
تۇرعىن ءۇيدى مىندەتتى ساقتاندىرۋ ءپوليسى ەلەكتروندى بولادى جانە ءبىر جىلعا راسىمدەلەدى. تولەمدەردى قابىلداۋ مەن قور اتىنان شارتتاردى راسىمدەۋدى ليسەنزياسى بار ساقتاندىرۋ كومپانيالارى جۇزەگە اسىرا الادى. بۇل جۇمىس ءۇشىن ولاردىڭ سىياقىسى ساقتاندىرۋ سىيلىقاقىسىنىڭ 10%-ىنا دەيىن بولۋى مۇمكىن.
پوليس ەكى جاعدايدا راسىمدەلۋى كەرەك: مەنشىك يەسى اۋىسقاندا — مەنشىك قۇقىعى تىركەلگەننەن كەيىن 10 جۇمىس كۇنى ىشىندە؛ ەگەر تۇرعىن ءۇي زاڭ تالاپتارىنا ساي بولسا، ءبىراق مەنشىك يەسى اۋىسپاسا — 60 كۇنتىزبەلىك كۇن ىشىندە.
الايدا وسى وڭىرلەردە توتەنشە جاعداي (تج) جاريالانسا، تۇرعىن ۇيگە جاڭا پوليس راسىمدەۋ مۇمكىن بولمايدى. شەكتەۋلەر تج جويىلعانشا ساقتالادى.
وسىلايشا، ەگەر جاڭا «ساقتاندىرۋ تۋرالى» زاڭ قابىلدانسا، پاتەر مەن ءۇي يەلەرى مىندەتتى ساقتاندىرۋ ءۇشىن جىل سايىن تولەۋگە ءماجبۇر بولادى. الايدا پوليس تەك ءۇش تابيعات اپاتىنان قورعايدى: سۋ تاسقىنى، جەر سىلكىنىسى جانە تابيعي ورتتەر. كەڭىرەك قورعانىس ءۇشىن ەرىكتى ساقتاندىرۋدى راسىمدەۋ قاجەت.
ايتا كەتەيىك، زاڭ جوباسى ءقازىر قوعامدىق تالقىلاۋ ساتىسىندا، ول 2026 جىلدىڭ 7 قازانىنا دەيىن جالعاسادى.
ەسكە سالايىق، بۇگىندە ءىرى تابيعات اپاتتارىنان كەيىن تۇرعىن ءۇيدى قالپىنا كەلتىرۋ نەگىزىنەن بيۋدجەت نەمەسە ازاماتتاردىڭ ءوز قاراجاتى ەسەبىنەن جۇزەگە اسىرىلادى.
سونداي-اق ساقتاندىرۋ سالاسىندا باسقا دا وزگەرىستەر جوسپارلانىپ وتىر، ولار تۋرالى ءبىزدىڭ ماتەريالدان بىلە الاسىزدار.