قازاقستاندىق جانە تاجىكستاندىق دارىگەرلەر تاجىريبە الماسىپ، بىرلەسكەن وتا جاساپ، شەبەرلىك ساباقتارىن وتكىزەدى. بۇل — قازاقستان مەديسيناسى كۇندەرى اياسىندا جۇزەگە اسىپ جاتىر، دەپ حابارلايدى infohub.kz سايتى.
تاجىكستانعا رەسپۋبليكالىق عىلىمي ورتالىقتاردىڭ كارديولوگيا، ونكولوگيا، اكۋشەرلىك-گينەكولوگيا، پەدياتريا جانە تراۆماتولوگيا سالاسىنداعى ماماندارى، سونداي-اق مەديسينالىق جوعارى وقۋ ورىندارىنىڭ وكىلدەرى جولعا شىقتى. دەلەگاسيانى دەنساۋلىق ساقتاۋ ۆيسە-مينيسترى ماناس رامازانوۆ باستاپ باردى.
قاتىسۋشىلار كارديولوگيا، كارديوحيرۋرگيا، ەندوكرينولوگيا، تراۆماتولوگيا، اكۋشەرلىك-گينەكولوگيا، پەدياتريا جانە باسقا دا باعىتتار بويىنشا جۇمىس ىستەيتىن بولادى. ولار پاسيەنتتەرگە كەڭەس بەرىپ، وتا جاساپ، شەبەرلىك ساباقتارىن وتكىزىپ، كۇردەلى كلينيكالىق جاعدايلاردى تالقىلايدى.
دۋشانبەدە قازاقستاندىق ماماندار تاجىك اكۋشەرلىك، گينەكولوگيا جانە پەريناتولوگيا عىلىمي-زەرتتەۋ ينستيتۋتىنا باردى. وندا ولار بولىمشەلەردىڭ جۇمىسىمەن تانىستى.
تاجىك دارىگەرلەرى ءۇشىن قازاقستاندىقتار اكۋشەرلىك قان كەتۋلەردى ەمدەۋدىڭ زاماناۋي تاسىلدەرى بويىنشا ارنايى پرەزەنتاسيالار دايىندادى.
تاعى ءبىر سەمينار قالقانشا بەزىنىڭ قاتەرسىز تۇيىندەرىن ەمدەۋگە ارنالدى. دارىگەرلەر راديوچاستوتتىق ابلياسيا ءادىسىن تالقىلادى. بۇل — ءتۇيىندى راديوچاستوتتىق ەنەرگيامەن جويۋعا مۇمكىندىك بەرەتىن از ءينۆازيۆتى ءادىس.
قازاقستاندىق دارىگەر ارمان يبرايەۆ تاجىك ارىپتەستەرىمەن بىرگە قالقانشا بەزى اۋرۋلارى بار پاسيەنتتەرگە كەڭەس بەرىپ، كلينيكالىق جاعدايلاردى تالدادى.
جاقىن ارادا ماماندار لور-حيرۋرگيا، بالالار مەن ەرەسەكتەر تراۆماتولوگياسى، نەوناتالدى حيرۋرگيا، بالالار اۋرۋلارىن ەمدەۋ جانە ونكوۋرولوگيا بويىنشا شەبەرلىك ساباقتارىن وتكىزەدى.
ساپار قورىتىندىسى بويىنشا تاراپتار بىرلەسكەن مەديسينالىق فورۋم وتكىزىپ، قازاقستان مەن تاجىكستاننىڭ مەديسينالىق ۇيىمدارى اراسىندا مەموراندۋمدارعا قول قويۋدى جوسپارلاپ وتىر.