سولتۇستىك قازاقستان وبلىسىندا پوليسەيلەر جالعان ءنومىرلى كولىكپەن قاشىپ قۇتىلماق بولعان جۇرگىزۋشىنى ۇستادى، دەپ حابارلايدى infohub.kz سايتى.
وبلىستىق پوليسيا دەپارتامەنتىنىڭ مالىمەتىنشە، 12 تامىزدا مامليۋتكا اۋدان ورتالىعىنا قاراي بەت العان جۇرگىزۋشىلەر پوليسيانىڭ قۋعىن كورىنىسىنە كۋا بولدى: ەكى قىزمەتتىك كولىك اق ءتۇستى «نيۆانى» قۋىپ بارا جاتتى. بۇل وقيعانىڭ ۆيدەوسى الەۋمەتتىك جەلىلەردە پايدا بولدى.
«پوليسەيلەر 42 جاستاعى جۇرگىزۋشىنى ۆوسكرەسەنوۆكا اۋىلىنىڭ ماڭىندا ۇستادى. ونىڭ ايتۋىنشا، ول "قورقىپ كەتكەندىكتەن" قاشىپ قۇتىلماق بولعان. پوليسەيلەردىڭ توقتاۋ تۋرالى تالابىنا مۇنداي دۇربەلەڭ رەاكسيا وعان 3 تاۋلىككە دەيىن اكىمشىلىك قاماققا الىنۋى مۇمكىن»، — دەيدى سقو دپ-دا.
ءتارتىپ ساقشىلارىنىڭ كولىككە نازار اۋدارۋىنا سەبەپ — اۆتوكولىكتىڭ سىرتقى ءتۇرى مەن مەملەكەتتىك ءنومىرىنىڭ سايكەس كەلمەۋى. ەر ادام كولىكتى جوندەۋ كەزىندە ءوزى كۋزوۆتى اۋىستىرعانىن ءتۇسىندىردى.
پوليسەيلەردىڭ ايتۋىنشا، مۇنداي اۋىستىرۋدان كەيىن ارنايى حقكو-عا حابارلاسىپ، قايتا تىركەۋ ماسەلەسىن شەشۋ جەتكىلىكتى ەدى. ەندى اۋىل تۇرعىنى پوليسيا قىزمەتكەرلەرىنىڭ زاڭدى تالابىنا باعىنباعانى ءۇشىن عانا ەمەس، جالعان مەملەكەتتىك ءنومىردى پايدالانعانى ءۇشىن دە اكىمشىلىك جاۋاپكەرشىلىككە تارتىلادى — 5 تاۋلىككە دەيىن قاماققا الىنىپ، 1 جىلعا كولىك جۇرگىزۋ قۇقىعىنان ايىرىلۋى مۇمكىن.