قازاقستانداعى سيفرلىق اكتيۆ يەلەرى ارتىق اۋدارىمدارسىز، ارنايى كريپتوكارتالار ارقىلى تولەم جاساۋ مۇمكىندىگىنە قول جەتكىزدى. مۇنداي ءونىمدى ەكى بانك ازىرلەدى، دەپ حابارلايدى infohub.kz سايتى.
كريپتوۆاليۋتالار — كوپشىلىك قابىلدايتىنداي تەك جوعارى تاۋەكەلدى سيفرلىق اكتيۆ قانا ەمەس، سونىمەن قاتار قارجىلىق ينفراقۇرىلىمدى جەتىلدىرىپ، جەدەلدەتۋدىڭ وراسان زور الەۋەتى. سوندىقتان ءارتۇرلى ەلدەر كريپتوتەحنولوگيالاردى ءداستۇرلى اقشا ەسەپ ايىرىسۋ سالاسىمەن بىرىكتىرۋگە ۇمتىلۋدا.
قازاقستاندا بۇل مۇمكىندىك كريپتوۆاليۋتا كارتالارى تۇرىندە ىسكە قوسىلدى. بۇل تۋرالى Astana Finance Days 2026 فورۋمى اياسىنداعى «قارجىلىق ينفراقۇرىلىمنىڭ بولاشاعى» پانەلدىك ديسكۋسسياسىندا سويلەگەن Mastercard-تىڭ قازاقستانداعى باس ديرەكتورى سانجار جامالوۆ ايتتى.
سپيكەردىڭ ايتۋىنشا، Mastercard «بانك سەنتركرەديت» جانە «ەۋرازيالىق بانك»-پەن سەرىكتەستىكتە كريپتوكارتالاردى ازىرلەگەن — بۇل كريپتوۆاليۋتانى تاۋارلار مەن قىزمەتتەرگە جۇمساۋعا مۇمكىندىك بەرەتىن قۇرال.
ول بۇل سيفرلىق اكتيۆتەردى پايدالانۋ تاجىريبەسىن ايتارلىقتاي جەڭىلدەتەتىنىن اتاپ ءوتتى: ادەتتە قازاقستاندىقتار بىرنەشە قۇرالمەن بىردەن جۇمىس ىستەۋ قاجەتتىلىگىنەن قورقادى — كريپتوبيرجادا اكتيۆتەردى ساتۋ كەرەك، بۇل بەلگىلى ءبىر ءبىلىم مەن داعدىنى تالاپ ەتەدى. مۇندا اقشانى دۇرىس ەمەس جەرگە جىبەرۋ قورقىنىشى تۋىندايدى، كۇردەلى جۇيەلەردى تۇسىنۋگە تۋرا كەلەدى. ال كريپتوكارتامەن تولەۋ پروسەسى قاراپايىم بانك كارتاسىنان ەش ايىرماشىلىعى جوق.
«ايتالىق، سىزدە كريپتوبيرجادا اقشا بار، ءارى سىزگە تانىس بانكتىڭ كريپتوكارتاسى بار. ەشتەڭە اۋدارۋدىڭ قاجەتى جوق — كارتانى الىپ، كەز كەلگەن ساتۋشىعا بارىپ، كارتامەن تولەيسىز. ياعني، ۇزدىكسىز ترانزاكسيا جاسالادى»، — دەدى سانجار جامالوۆ.
بۇل رەتتە ەسەپ ايىرىسۋ كريپتوۆاليۋتا ارقىلى ەمەس، تەڭگەمەن جۇزەگە اسادى: كريپتوكارتامەن تولەگەندە «استانا» حالىقارالىق قارجى ورتالىعىنىڭ الاڭىندا كريپتوبيرجا مەن ەكىنشى دەڭگەيلى بانك اراسىندا سيفرلىق اكتيۆ ۇلتتىق ۆاليۋتادا اعىمداعى باعام بويىنشا كونۆەرتاسيالانادى؛ ساتۋشى تولەمدى تەڭگەمەن لەزدە الادى.
«بۇل — رەتتەلەتىن ستاندارتتى ترانزاكسيا. جانە بۇل جۇيەلەر اراسىنداعى ينتەروپەرابەلدىلىكتى قۇرۋ ءۇشىن ماڭىزدى قادام، وسىنىڭ ءبارى ۇزدىكسىز، ءقاۋىپسىز جانە بارلىعىنا قولايلى بولۋى ءۇشىن»، — دەپ قورىتىندىلادى سانجار جامالوۆ.
سونداي-اق Mastercard باسشىسى Crypto Credential جۇيەسىن قۇرۋ تۋرالى ايتتى — ول كريپتواميانداردىڭ ۇزىن جانە كۇردەلى مەكەنجايلارىن قاراپايىم جانە تۇسىنىكتى بۇركەنشىك اتتارمەن (الياستارمەن) نەمەسە پايدالانۋشى ەسىمدەرىمەن قىسقارتۋ ارقىلى پايدالانۋشىلار اراسىندا كريپتوۆاليۋتا اۋدارۋدى ايتارلىقتاي جەڭىلدەتەدى.
باسقاشا ايتقاندا، كريپتوۆاليۋتا تەحنولوگيالارى ءداستۇرلى قارجى جۇيەسىنە بەلسەندى ەنگىزىلىپ، كوپتەگەن پروسەستەردى جەڭىلدەتىپ، پايدالانۋشىلارعا كوبىرەك مۇمكىندىكتەر ۇسىنۋدا.