قازاقستاندىق كريپتوۆاليۋتا قولدانۋشىلارىنىڭ ۇشتەن ءبىرى دەرلىك سيفرلىق اكتيۆتەرمەن تاۋار مەن قىزمەت ءۇشىن تولەم جاسايدى. ال 90%-دان استامى جاقىن 3–5 جىلدا كريپتوۆاليۋتانىڭ ەلدە كەڭ تارالۋىن كۇتەدى. بۇل دەرەكتەردى Binance Kazakhstan ءوزىنىڭ 2 000-عا جۋىق قولدانۋشىسى اراسىندا جۇرگىزگەن ساۋالناما قورىتىندىسى بويىنشا كەلتىرىپ وتىر، دەپ حابارلايدى infohub.kz سايتى.
كريپتوۆاليۋتا ءداستۇرلى تۇردە سپەكۋلياتيۆتى اكتيۆ رەتىندە قابىلدانادى — ونى تەك قايتا ساتۋ مەن تابىس تابۋ ءۇشىن الادى دەپ ەسەپتەلەدى. الايدا ساۋالناما ناتيجەلەرى سيفرلىق اكتيۆتەرگە قىزىعۋشىلىقتىڭ تەز ءوسىپ كەلە جاتقانىن كورسەتەدى. رەسپوندەنتتەردىڭ ۇشتەن بىرگە جۋىعى ونى ساتىپ الۋعا تولەم جاساۋ ءۇشىن قولدانادى.
كريپتوۆاليۋتانى قازىرگى نەمەسە بولاشاقتا قولدانۋ ماقساتتارى اراسىندا 60،2% ينۆەستيسيانى، 58،5% قوسىمشا تابىس تابۋدى، 48،8% ۇزاق مەرزىمدى جيناقتاۋدى، 42،6% ترەيدينگتى اتاعان. پراكتيكالىق سەناريلەر دە ايتارلىقتاي ورىن الادى: 32،8% تاۋار مەن قىزمەتكە تولەمدى، 25،1% حالىقارالىق اۋدارىمداردى تاڭداعان.
قازاقستاندىقتار سيفرلىق اكتيۆتەردى پراكتيكالىق قولدانۋدا ايتارلىقتاي وزگەرىستەر كۇتەدى. ماسەلەن، رەسپوندەنتتەردىڭ 64،6%-ى جاقىن 3–5 جىلدا ەڭ جىلدام كريپتولەمدەر داميدى دەپ سانايدى — بۇل ۇسىنىلعان باعىتتار اراسىنداعى ەڭ جوعارى كورسەتكىش.
ەكىنشى ورىندا حالىقارالىق اۋدارىمدار — 42،6%، ينۆەستيسيانى دا شامامەن سونشا قاتىسۋشى تاڭداعان — 42،1%. تاعى 35% كريپتوكارتالاردىڭ، ال 27،8% ستەيبلكويندەردىڭ بەلسەندى دامۋىن كۇتەدى.
«بۇل كۇتۋلەر نارىقتىڭ ءوزىن قابىلداۋدىڭ وزگەرۋىمەن ۇشتاسادى: رەسپوندەنتتەردىڭ 40،3%-ى كريپتونارىق بىرتىندەپ پراكتيكالىق سيپات الىپ كەلەدى دەپ ەسەپتەسە، تاعى 25،1%-ى ول ءقازىردىڭ وزىندە قارجى جۇيەسىنىڭ بولىگىنە اينالدى دەپ سانايدى»، — دەيدى Binance Kazakhstan وكىلدەرى.
ساۋالناماعا قاتىسۋشىلار قازاقستانداعى سيفرلىق اكتيۆتەردىڭ بولاشاعىن وڭ باعالايدى. بيرجا دەرەكتەرىنە سايكەس، 91،2% جاقىن 3–5 جىلدا ەلدە كريپتوۆاليۋتا قولدانۋ كەڭ تارالادى دەپ ەسەپتەيدى: 46،4% «ءيا، ءسىرا» دەپ جاۋاپ بەرسە، تاعى 44،8% ايتارلىقتاي ءوسىم كۇتەدى.
قاتىسۋشىلاردىڭ جارتىسىنا جۋىعى — 47،9% — بەس جىلدان كەيىن كريپتوۆاليۋتالار كۇندەلىكتى قارجىنىڭ ءبىر بولىگىنە اينالادى دەپ سانايدى، ال 20،3% ولار نەگىزىنەن ينۆەستيسيا ءۇشىن قولدانىلادى دەپ كۇتەدى.
«ساۋالناما ناتيجەلەرى قولدانۋشىلاردىڭ سيفرلىق اكتيۆتەرگە قىزىعۋشىلىعى الۋان ءتۇرلى بولا تۇسكەنىن كورسەتەدى. ينۆەستيسيا ماڭىزدى ءرولىن ساقتاي وتىرىپ، سونىمەن قاتار تولەمدەر، اۋدارىمدار جانە باسقا دا قارجى وپەراسيالارى سياقتى پراكتيكالىق سەناريلەرگە قىزىعۋشىلىق ارتىپ كەلەدى. اسىرەسە، قاتىسۋشىلاردىڭ كريپتولەمدەردى جاقىن جىلداردا ەڭ جىلدام داميتىن باعىت دەپ ءجيى اتاۋى ەرەكشە كورسەتكىش. نارىقتىڭ ودان ءارى دامۋى ءۇشىن قولجەتىمدىلىك، قاۋىپسىزدىك جانە پايدالانۋشىلاردى وقىتۋ باعىتىندا جۇمىستى جالعاستىرۋ ماڭىزدى»، — دەدى Binance Kazakhstan باس مەنەدجەرى نۇرحات كۇشىموۆ.