ەكولوگيا ءمينيسترى جاڭا بۇيرىققا قول قويدى، وعان سايكەس قازاقستاندىقتار باس تارتقىسى كەلەتىن ءۇي جانۋارىنا جاڭا يە ىزدەۋگە مىندەتتەلەدى، دەپ حابارلايدى infohub.kz سايتى.
نورماتيۆتىك قۇقىقتىق اكتىلەردىڭ ەتالوندىق باقىلاۋ بانكىندە ەكولوگيا، گەولوگيا جانە تابيعي رەسۋرستار ءمينيسترىنىڭ 2022 جىلعى 20 مامىرداعى «ءۇي جانۋارلارىن ۇستاۋ جانە سەرۋەندەتۋدىڭ ۇلگىلىك قاعيدالارىن بەكىتۋ تۋرالى» بۇيرىعىنا وزگەرىستەر ەنگىزەتىن بۇيرىعى جاريالاندى.
جاڭاشىلدىقتار ءۇي جانۋارىنان باس تارتاتىن قازاقستاندىقتار وعان جاڭا يە تابۋى كەرەكتىگىن رەتتەيدى. «ءۇي جانۋارىن ودان ءارى ۇستاۋ مۇمكىن بولماعان جاعدايدا، ءۇي جانۋارىنىڭ يەسى جانە (نەمەسە) جاۋاپتى تۇلعا ءۇي جانۋارىن ودان ءارى ورنالاستىرۋ شارالارىن قابىلدايدى، ونىڭ ىشىندە ونى جانۋارلارعا ارنالعان پانالايتىن ورىنعا، جانۋارلاردى ۋاقىتشا ۇستاۋ پۋنكتىنە نە ونى ۇستاۋ ءۇشىن قاجەتتى جاعدايلار جاساي الاتىن جەكە نەمەسە زاڭدى تۇلعالارعا بەرۋ ارقىلى. ءۇي جانۋارىن جانۋارلاردى ۋاقىتشا ۇستاۋ پۋنكتىنە بەرۋ كەزىندە ءۇي جانۋارىنىڭ يەسى نەمەسە جاۋاپتى تۇلعا جانۋاردىڭ زاڭدى تاعدىرى انىقتالعانعا دەيىن ونى ۇستاۋدى قامتاماسىز ەتەدى»، — دەلىنگەن بۇيرىقتا.
سونداي-اق بۇيرىقتا جانۋاردان باس تارتۋ يەسىنىڭ ءۇي جانۋارىنا جاۋاپكەرشىلىگىنىڭ توقتاتىلۋىن بىلدىرمەيتىنى كورسەتىلگەن. «جانۋاردان باس تارتۋ ءۇي جانۋارىنىڭ يەسىنىڭ نەمەسە جاۋاپتى تۇلعانىڭ ءۇي جانۋارىنا قاتىستى مىندەتتەرىنىڭ توقتاتىلۋىنا اكەپ سوقپايدى، وعان مەنشىك قۇقىعى باسقا تۇلعاعا وتكەنگە دەيىن، ءۇي جانۋارى جانۋارلارعا ارنالعان پانالايتىن ورىنعا بەرىلگەنگە دەيىن نەمەسە ونى جانۋارلاردى ۋاقىتشا ۇستاۋ پۋنكتىنە بەرۋ كەزىندە جانۋاردىڭ زاڭدى تاعدىرى انىقتالعانعا دەيىن»، — دەلىنگەن قۇجاتتا.
بۇيرىق ول العاش رەت رەسمي جاريالانعان كۇننەن كەيىن ون كۇنتىزبەلىك كۇن وتكەن سوڭ قولدانىسقا ەنگىزىلەدى.