2026 جىلعى تامىز ايىنىڭ قورىتىندىسى بويىنشا قازاقستاندىقتار وتاندىق بانكتەردەگى دەپوزيتتەر مەن شوتتاردا 30،5 ترلن تەڭگەدەن استام قاراجات جيناقتادى. بۇل سومانىڭ 80%-دان استامى تەڭگەمەن ساقتالىپ وتىر. جۋرناليستەردىڭ اتاپ وتۋىنشە، دەپوزيتتەر جيناق قالىپتاستىرۋدىڭ ەڭ تانىمال قۇرالدارىنىڭ ءبىرى بولىپ قالا بەرەدى، ويتكەنى ەكىنشى دەڭگەيدەگى وتاندىق بانكتەر ۇسىنىپ وتىرعان پايىزدار ەلدەگى ينفلياسيادان ايتارلىقتاي جوعارى، دەپ حابارلايدى infohub.kz سايتى.
قازاقستان رەسپۋبليكاسى ۇلتتىق بانكىنىڭ دەرەكتەرىنە سايكەس، تامىزدا اشىلعان جەكە تۇلعالار دەپوزيتتەرى بويىنشا نارىقتاعى ورتاشا سىياقى مولشەرلەمەسى 15،7% بولدى. سالىستىرار بولساق، جالپى ينفلياسيا 9،8% دەڭگەيىندە تۇر. سونىمەن قاتار مولشەرلەمەلەر ءۇش اي قاتارىنان تومەندەپ كەلەدى: شىلدەدە ولار 15،9%، ماۋسىمدا — 16،2%، ال مامىردا نارىق بويىنشا ورتا ەسەپپەن 16،8% بولعان. دەگەنمەن كەيبىر دەپوزيتتىك ونىمدەر ءالى دە 20% شاماسىنداعى مولشەرلەمەمەن جۇمىس ىستەپ تۇر.
بانك سالىمدارى قازاقستاندىقتار ءۇشىن تيىمدىلىگى ازايىپ كەلە جاتسا دا، ولاردىڭ جالپى كولەمى ءوسۋىن جالعاستىرىپ وتىر. ۇلتتىق بانكتىڭ دەرەكتەرى بويىنشا، تامىزدا جەكە تۇلعالاردىڭ بانك دەپوزيتتەرىندە شامامەن 30،5 ترلن تەڭگە جيناقتالعان. ءبىر ايدا سوما 0،49%-عا، ال ءبىر جىلدا بىردەن 17،33%-عا ءوستى. ايتا كەتەرلىگى، ءوسىم نەگىزىنەن تەڭگەلىك سالىمدار ەسەبىنەن بولىپ وتىر: ولار ءبىر جىلدا 22،69%-عا ارتىپ، 24،7 ترلن تەڭگەگە جەتتى، ال شەتەل ۆاليۋتاسىنداعى دەپوزيتتەر 0،94%-عا ازايىپ، 5،9 ترلن تەڭگە بولدى. قاراپايىم تىلمەن ايتقاندا، ءقازىر ازاماتتاردىڭ بارلىق جيناعىنىڭ 80%-دان استامى تەڭگەلىك سالىمدارعا تيەسىلى.
بارلىق جيناقتىڭ باسىم بولىگى مەرزىمدى جانە مەرزىمسىز دەپوزيتتەردە ساقتالىپ وتىر — شامامەن 24،4 ترلن تەڭگە. تاعى 3،6 ترلن تەڭگەگە جۋىق قاراجات ازاماتتاردىڭ اعىمداعى شوتتارى مەن تالاپ ەتىلگەنگە دەيىنگى سالىمدارىندا جاتىر. تامىزدا جيناق دەپوزيتتەرىندە 2،6 ترلن تەڭگەگە جۋىق، ال شارتتى سالىمداردا شامامەن 7،7 ملرد تەڭگە بولدى.
وسىلايشا، مولشەرلەمەلەردىڭ تومەندەۋىنە قاراماستان، دەپوزيتتەردىڭ كولەمى ءوسۋىن جالعاستىرىپ وتىر. بولاشاقتا شەتەل ۆاليۋتاسىنداعى دەپوزيتتەردىڭ شارتتارى جاقسارىپ، ولار سالىمشىلار ءۇشىن تارتىمدىراق بولۋى مۇمكىن.