الماتىداعى Farabi Hub الاڭىندا ستۋدەنتتەر اراسىنداعى شاحماتتان كوماندالىق الەم چەمپيوناتى — FIDE World University Team Chess Championship-2026-نىڭ ءبىرىنشى ويىن كۇنى اياقتالدى. ەكى تۋردىڭ قورىتىندىسى بويىنشا D توبىنداعى تورتتىكتى قازاقستاندىق كوماندالار — قازۇۋ جانە قسۋ باستاپ تۇر، دەپ حابارلايدى infohub.kz سايتى.
رەگلامەنتكە سايكەس، الەمنىڭ ون ەلىنەن كەلگەن 16 قۇراما جەرەبە قورىتىندىسى بويىنشا ءتورت توپقا ءبولىنىپ، بىر-بىرىمەن ەكى ماچتان دوڭگەلەك جۇيەدە وتكىزەدى.
قازاق ۇلتتىق ۋنيۆەرسيتەتىنىڭ (قازۇۋ) قۇراماسى تۋرنيردە سەنىمدى ستارت الدى. ءبىرىنشى تۋردا وكسفورد ستۋدەنتتەرىن 3:1 ەسەبىمەن ۇتسا، ەكىنشى تۋردا دا سول قارسىلاسىن 3،5:0،5 ەسەبىمەن جەڭىپ، ءوز باسىمدىعىن راستادى. بۇل ماچتاردا فيدە شەبەرى ەرلان تلەۋحانوۆ، سونداي-اق بەكارىس تۇرسىنالي مەن سۇلتان امانجول جەڭىسكە جەتتى. ەكى كوماندالىق ۇپاي جيناعان تۋرنير يەلەرى D توبىن باستاپ تۇر.
1،5 ۇپايمەن ەكىنشى ورىندا سپورت ۋنيۆەرسيتەتىنىڭ (قسۋ) كومانداسى تۇر. ولار ەكىنشى تۋردا يندونەزيالىق ستۋدەنتتەرمەن 2:2 ەسەبىمەن تەڭ وينادى. بۇل تۋردا استانالىقتارعا جالعىز جەڭىستى حالىقارالىق شەبەر مەرۋەرت كاماليدەنوۆا اكەلدى.
ەكى تۋردان كەيىن ەكى كوماندالىق ۇپايدان رەسەيدىڭ ورال مەملەكەتتىك تاۋ-كەن ۋنيۆەرسيتەتىنىڭ (ومتكۋ)، سونداي-اق امەريكالىق سەنت-لۋيس، داللاس جانە گرەك افينا كوماندالارىنىڭ اكتيۆىندە بار.
ەرتەڭ 3ء-شى جانە 4ء-شى تۋرلاردىڭ پارتيالارى وتەدى. دوڭگەلەك جۇيەدەگى ماچتار ءار تورتتىكتەن ەكى ۇزدىك كوماندانى انىقتايدى. ودان ءارى پلەي-وفف: شيرەك فينال، جارتىلاي فينال، ءۇشىنشى ورىن ءۇشىن ماچ جانە فينال وتەدى.
ويىندار ءتورت تاقتادا وتەدى. ءار كوماندا قۇرامىندا كەمىندە ءبىر ەر جانە كەمىندە ءبىر ايەل بولۋى ءتيىس. ۋاقىت باقىلاۋى — ءبىرىنشى جۇرىستەن باستاپ ءار جۇرىسكە 45 مينۋت پليۋس 30 سەكۋند.
ءتۋرنيردى فيدە قازاقستان رەسپۋبليكاسى تۋريزم جانە سپورت مينيسترلىگىمەن، قازاقستان رەسپۋبليكاسى عىلىم جانە جوعارى ءبىلىم مينيسترلىگىمەن، قازاقستان شاحمات فەدەراسياسىمەن جانە الماتى قالاسى اكىمدىگىمەن بىرلەسىپ ۇيىمداستىرىپ وتىر. باس سەرىكتەستەر — Freedom كومپانيالار توبى جانە «شاپاعات» كورپوراتيۆتىك قورى.
جالپى جۇلدە قورى 50 مىڭ ەۋرونى قۇرايدى. چەمپيوندار 25 مىڭ ەۋرو، ۆيسە-چەمپيوندار 15 مىڭ ەۋرو، ال ءۇشىنشى ورىن العان كوماندا 10 مىڭ ەۋرونى بولىسەدى.