«قازاۆتوجول» ۇلتتىق كومپانياسى مەردىگەر جانە قوسالقى مەردىگەر ۇيىمدارعا الاياقتار تۋرالى ەسكەرتۋ جاسادى. ولار وزدەرىن دەلدال رەتىندە تانىستىرىپ، سىياقى ءۇشىن جول جوبالارى مەن جۇمىس كولەمدەرىن الۋعا جاردەمدەسەتىنىن ايتادى، دەپ حابارلايدى infohub.kz سايتى.
بەلگىسىز ادامدار كومپانيا وكىلدەرىنە حابارلاسىپ، ۇلتتىق كومپانيا ىشىندە بايلانىستارى بار ەكەنىن مالىمدەيدى. ولار اقشا ءۇشىن جۇمىستاردى بولۋگە نەمەسە ساتىپ الۋ راسىمدەرىنىڭ ناتيجەلەرىنە اسەر ەتۋگە ۋادە بەرەدى.
«كومپانيا باسشىلىعى مەن قىزمەتكەرلەرى ءۇشىنشى تۇلعالارعا كەلىسسوزدەر جۇرگىزۋگە، جوبالار الۋعا ۋادە بەرۋگە، جەتكىزۋشىلەردىڭ مۇددەسىن لوببيلەۋگە نەمەسە تەندەر ناتيجەلەرىنە اسەر ەتۋگە وكىلەتتىك بەرمەگەن»، — دەپ مالىمدەدى «قازاۆتوجولدا».
ءبىر جاعدايدا بوگدە ادامدار كومپانيانىڭ باس كەڭسەسىنە كەلىپ، «جوبالار بويىنشا ماسەلەلەردى شەشۋدى» ۇسىنعان. قاۋىپسىزدىك قىزمەتى بۇل فاكتىنى انىقتاپ، ماتەريالداردى قۇقىق قورعاۋ ورگاندارىنا تاپسىرعان.
«بۇل ادامداردىڭ «قازاۆتوجول» ۇك» اق قىزمەتىنە ەش قاتىسى جوق. بارلىق ساتىپ الۋ راسىمدەرى قازاقستان رەسپۋبليكاسىنىڭ زاڭناماسىنا سايكەس قانا جۇزەگە اسىرىلادى»، — دەلىنگەن ۇلتتىق كومپانيا حابارلاماسىندا.
كونكۋرستار، قاتىسۋ شارتتارى، ءوتىنىم بەرۋ مەرزىمدەرى جانە ساتىپ الۋ ناتيجەلەرى تۋرالى اقپارات قازاقستاننىڭ مەملەكەتتىك ساتىپ الۋ رەسمي ۆەب-پورتالىندا ورنالاستىرىلادى.
كومپانيا مۇنداي ۇسىنىستاردا الاياقتىق، زاڭسىز دەلدالدىق جانە نارىق قاتىسۋشىلارىن سىبايلاس جەمقورلىق سحەمالارىنا تارتۋ ارەكەتتەرىنىڭ بەلگىلەرى بولۋى مۇمكىن ەكەنىن اتاپ ءوتتى.
«كومپانيا مەردىگەر جانە قوسالقى مەردىگەر ۇيىمداردى ساق بولۋعا، كۇماندى تۇلعالارعا اقشا اۋدارماۋعا، بەيرەسمي كەلىسسوزدەرگە تۇسپەۋگە جانە ساتىپ الۋ تۋرالى بارلىق اقپاراتتى تەك رەسمي كوزدەر ارقىلى تەكسەرۋگە شاقىرادى»، — دەلىنگەن حابارلامادا.
كۇدىكتى ۇسىنىستار تۋرالى «قازاۆتوجولدىڭ» سىبايلاس جەمقورلىققا قارسى كومپلاەنس قىزمەتىنە +7 (7172) 64-87-35 سەنىم تەلەفونى، 1403 كولل-ورتالىعى نەمەسە hotline@qaj.kz ەلەكتروندىق پوشتاسى ارقىلى حابارلاۋعا بولادى.