ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرى Kazakh Tourism Development Ltd. اتقارۋشى ديرەكتورى ەرجان ەركىنباەۆپەن كەزدەسۋ ۇيىمداستىرىپ، Almaty SuperSki جوباسى مەن كوك-جايلاۋ اۋماعىن دامىتۋ جوسپارلارىن تالقىلادى. بۇل تۋرالى infohub.kz سايتى حابارلايدى.
كەزدەسۋگە قاتىسۋشىلاردى ەڭ الدىمەن كوك-جايلاۋدا قانداي ينفراقۇرىلىم سالىناتىنى، جوبانىڭ تابيعي اۋماققا جانە الماتىلىقتاردىڭ تاۋعا قاتىناۋ مۇمكىندىگىنە قالاي اسەر ەتەتىنى، سونداي-اق تۋريستىك اعىندى قالاي رەتتەۋ جوسپارلانىپ وتىرعانى قىزىقتىردى.
ەرجان ەركىنباەۆتىڭ ايتۋىنشا، بۇگىندە جوبا توڭىرەگىندە ءتۇرلى پىكىر ايتىلىپ ءجۇر، سوندىقتان كومپانيا ستۋدەنتتەرمەن تىكەلەي تالقىلاۋعا جانە تۋىنداعان سۇراقتارعا جاۋاپ بەرۋگە دايىن.
«بۇل كەزدەسۋگە ءبىزدى ستۋدەنتتەردىڭ وزدەرى شاقىردى. مەن ءۇشىن بۇل — جاستاردىڭ كوك-جايلاۋ توڭىرەگىندە بولىپ جاتقان جاعدايعا بەي-جاي قارامايتىنىنىڭ ماڭىزدى كورسەتكىشى. Almaty SuperSki جوباسى جونىندە ءتۇرلى پىكىر ايتىلىپ ءجۇر، ال انىقتاۋدىڭ ەڭ ءتيىمدى جولى — تىكەلەي سويلەسۋ»، — دەدى ول.
تالقىلاۋعا سونداي-اق الپينيزم جانە سكالولازانيە فەدەراسياسىنىڭ پرەزيدەنتى نۇرسۇلتان شوقانوۆ، قازۇۋ-دىڭ بوتانيكا جانە اگروەكولوگيا كافەدراسىنىڭ مەڭگەرۋشىسى، بيولوگيا عىلىمدارىنىڭ كانديداتى نۇرسۇلۋ احتاەۆا، قوعام وكىلدەرى مەن ستۋدەنتتەر قاتىستى.
شوقانوۆ تاۋ اۋماعىن دامىتۋ كەزىندە قالا تۇرعىندارىنا قولايلىلىق باستى قاعيداتتاردىڭ ءبىرى بولىپ قالۋى كەرەگىن اتاپ ءوتتى.
قاتىسۋشىلار جوبانىڭ ەكولوگيالىق قۇرامداس بولىگىن دە جەكە تالقىلادى. نۇرسۇلۋ احتاەۆانىڭ ايتۋىنشا، عالىمدار اۋماقتى زەرتتەۋدى جالعاستىرىپ جاتىر. ول الدىن الا ناتيجەلەرگە سايكەس Almaty SuperSki جوباسىنىڭ كوك-جايلاۋ ەكوجۇيەسىنە تەرىس اسەرى جوق ەكەنىن مالىمدەدى.
تاعى ءبىر تاقىرىپ — جۇمىسپەن قامتۋ بولدى. ستۋدەنتتەر جوبا ىسكە قوسىلعاننان كەيىن قانداي ماماندار قاجەت بولاتىنىن جانە الماتىلىق جوعارى وقۋ ورىندارىنىڭ تۇلەكتەرى تاۋ ءتۋريزمى، ەكولوگيا، ينجەنەريا جانە سەرۆيس سالالارىندا جۇمىس ىستەي الاتىنىن سۇرادى.
ەركىنبايەۆ جوباعا ءتۇرلى باعىتتاعى ماماندار، سونىڭ ىشىندە جاس تۇلەكتەر دە قاجەت بولاتىنىن ايتتى.
«ءبىز ءۇشىن Almaty SuperSki جوباسىنىڭ دامۋى تەك تۋريستەرگە عانا ەمەس، الماتىلىقتاردىڭ وزدەرىنە دە مۇمكىندىك تۋعىزعانى ماڭىزدى. ونىڭ ىشىندە بۇگىندە ۋنيۆەرسيتەتتەردە وقىپ جاتقان جاس ماماندارعا دا»، — دەدى ول.
ستۋدەنتتەردىڭ وزدەرى بۇل باستامانى كوك-جايلاۋ تۋرالى اقپاراتتى الەۋمەتتىك جەلىلەردەگى تالقىلاۋلاردان ەمەس، جوبا وكىلدەرىنەن تىكەلەي الۋ نيەتىمەن ءتۇسىندىردى.
«ءبىز ءۇشىن كوك-جايلاۋ — كارتاداعى دەرەكسىز اۋماق ەمەس. ءبىز وندا ءجيى بولامىز، بۇل جەردى جاقسى بىلەمىز، سوندىقتان Almaty SuperSki جوباسى جۇزەگە اسقاننان كەيىن ونىڭ قانداي بولاتىنىن تۇسىنگىمىز كەلەدى. سونىمەن قاتار جوبا بولاشاقتا بىزگە جاس مامان رەتىندە قانداي مۇمكىندىكتەر بەرەتىنىن ءبىلۋ دە قىزىق»، — دەدى كەزدەسۋگە قاتىسۋشىلاردىڭ ءبىرى.
پىكىرتالاس بارىسىندا جاستار الماتى تاۋلارىنىڭ الداعى جىلدارى قالاي دامۋى كەرەگى تۋرالى ماسەلەنى دە كوتەردى. كوك-جايلاۋ سەرۋەندەۋ مەن دەمالىس ءۇشىن تانىمال ورىن بولىپ قالا بەرگەندىكتەن، اۋماقتى وزگەرتۋ جوسپارلارى قالا تۇرعىندارىنىڭ قىزىعۋشىلىعىن تۋعىزىپ وتىر.
كەزدەسۋدى ۇيىمداستىرعان ستۋدەنتتەر JANA LEP قوعامدىق قوزعالىسىنىڭ دا باستاماشىلارى بولدى. ونىڭ قاتىسۋشىلارى جاستار مەن بەلسەندى تۇرعىنداردى الماتىنىڭ بولاشاعىن تالقىلاۋ توڭىرەگىندە بىرىكتىرۋدى ماقسات ەتەتىندەرىن مالىمدەدى.