1 قازاندا قازاقستاندا اۋىل شارۋاشىلىعى تاۋارىن وندىرۋشىلەردەن 2027 جىلعى كوكتەمگى ەگىس جانە ەگىن جيناۋ جۇمىستارىن قارجىلاندىرۋعا ءوتىنىم قابىلداۋ باستالادى. مەملەكەتتىك قولداۋ «كەڭ دالا 2» باعدارلاماسى اياسىندا جۇزەگە اسادى، دەپ حابارلايدى infohub.kz سايتى.
كەلەسى ماۋسىمعا دايىندىققا 200 ملرد تەڭگە جۇمساۋ جوسپارلانۋدا. فەرمەرلەر ءۇشىن سىياقى مولشەرلەمەسى جىلدىق 5 پايىزدى قۇرايدى. پرەمەر-مينيستردىڭ سايتىندا اتاپ وتىلگەندەي، مۇنداي ءتاسىل ەگىس ناۋقانىنا دايىندىق ساپاسىن ارتتىرۋ ءۇشىن قولدانىلادى.
«تۇقىم، تىڭايتقىش، وسىمدىك قورعاۋ قۇرالدارى، جانارماي جانە قوسالقى بولشەكتەر شارۋاشىلىققا تەحنيكا دالاعا شىققان كۇنى ەمەس، ودان الدەقايدا ەرتە قاجەت»، — دەلىنگەن ۇكىمەت حابارلاماسىندا.
ەرتە نەسيەلەۋ فەرمەرلەرگە قور جيناپ، اۋىل شارۋاشىلىعى سيكلىنىڭ ەڭ قارقىندى كەزەڭى باستالعانشا قارجىلىق جۇكتەمەنى بولۋگە مۇمكىندىك بەرەدى.
سوڭعى ءۇش جىلدا سالاعا بەرىلگەن جەڭىلدەتىلگەن نەسيە كولەمى شامامەن 1،8 ەسە ءوستى. 2024 جىلى بۇل ماقساتقا 421 ملرد تەڭگە باعىتتالدى. 2025 جىلى قولداۋ سوماسى 649،3 ملرد تەڭگەگە دەيىن ۇلعايدى. 2026 جىلى كوكتەمگى ەگىس جانە ەگىن جيناۋ جۇمىستارىنىڭ بيۋدجەتى 750 ملرد تەڭگە بولدى.
«2026 جىلعى 28 قىركۇيەكتەگى جاعداي بويىنشا اگراريلەرگە 664،4 ملرد تەڭگە بەرىلدى، قارجىلاندىرۋ 8 ملن گەكتاردان استام جەردى قامتىدى»، — دەلىنگەن حابارلامادا.
كەپىلدىك بازاسى جەتكىلىكسىز شارۋاشىلىقتار ءۇشىن ارنايى كەپىلدەندىرۋ تەتىگى جۇمىس ىستەيدى. ول قارىز سوماسىنىڭ 85 پايىزىنا دەيىنگى بولىگىن جابۋدى كوزدەيدى. بيىل ينۆەستورلارعا وسىنداي 1735 كەپىلدىك 274،2 ملرد تەڭگەگە بەرىلدى.
سونىمەن قاتار قازاقستاندا ەگىن جيناۋ ناۋقانى جالعاسىپ جاتىر. بۇگىنگى تاڭدا اگراريلەر 13،5 ملن گەكتار ءداندى داقىلدى جينادى، بۇل ەگىس القابىنىڭ جالپى كولەمىنىڭ 83 پايىزىن قۇرايدى. گەكتارىنان ورتاشا 14،7 سەنتنەر ءونىم الىنىپ، رەسپۋبليكا بويىنشا 19،9 ملن توننا استىق باستىرىلدى.
ليسەنزيالانعان كاسىپورىندارعا جاڭا ءونىمنىڭ 4،9 ملن توننا استىعى ءتۇستى. بۇل كورسەتكىش وتكەن جىلدىڭ وسى كەزەڭىندەگى ناتيجەمەن سالىستىرعاندا 20 پايىزعا ارتىق. ساقتاۋعا تۇسكەن جۇمساق بيدايدىڭ 74 پايىزى جوعارى ساپالى ءونىم رەتىندە جىكتەلدى. تاعى 20 پايىزى ءتورتىنشى سىنىپقا، ال التى پايىزى بەسىنشى سىنىپقا جات قىزىلدى.