«چەلسي» باس باپكەرى حابي الونسو داستان ساتپاەۆتىڭ لوندوندىق كوماندا ساپىنداعى دەبيۋتتىك گولىنان كەيىن ونىڭ ويىنىن جوعارى باعالادى. ول 17 جاستاعى فۋتبولشىنىڭ جىلدامدىعى، فيزيكالىق قاسيەتتەرى مەن قوزعالۋ مانەرىن ەرەكشە اتاپ ءوتتى. «مەن داستانمەن بىلتىرعى جىلدان بەرى تانىسپىن، ول الماتىدا «قايرات» ساپىندا وينادى. بىردەن كورۋگە بولادى، بۇل ەرەكشە ويىنشى»، — دەپ الونسونىڭ ءسوزىن football.london كەلتىردى، دەپ حابارلايدى infohub.kz.
ساتپايەۆ يسپاندىق باپكەردىڭ باسشىلىعىمەن وتكەن «چەلسي» ماۋسىم الدىنداعى ءبىرىنشى ماچتا گول سوقتى. قازاقستاندىق ويىنشى سول قاپتالدا نەگىزگى قۇرامدا شىعىپ، جەتىنشى مينۋتتا «ۆەستەرن سيدنەي ۋوندەرەرس» كومانداسىنا قارسى ويىندا ەسەپ اشتى. لوندوندىقتار 6:4 ەسەبىمەن جەڭىسكە جەتتى.
الونسونىڭ ايتۋىنشا، قازاقستاندىق فۋتبولشى قاپتالدا ويناعاندا دا، ورتالىق ايماققا اۋىسقاندا دا قارسىلاس قاقپاسىنا ءقاۋىپ توندىرە الادى. «ول قارسىلاس قاقپاسىنا ۇنەمى ءقاۋىپ توندىرەدى، سىزىقتار اراسىنداعى كەڭىستىكتى وتە جاقسى شابۋىلدايدى، شابۋىلشىنىڭ قاسىندا ارەكەت ەتەدى، قاپتالدان ورىن اۋىستىرۋدى دۇرىس جۇزەگە اسىرادى»، — دەپ اتاپ ءوتتى باپكەر.
«چەلسي» باپكەرى ساتپاەۆتىڭ قازاقستاننان كوشىپ كەلگەننەن كەيىنگى بەيىمدەلۋىن دە وڭ باعالادى. «ول ءۇشىن بۇل قازاقستاننان كوشىپ كەلگەننەن كەيىنگى العاشقى تاجىريبە جانە ءبىزدىڭ كلۋبتاعى العاشقى قادامدار، ازىرگە ول وتە جاقسى اسەر قالدىرىپ وتىر».
ساتپاەۆتىڭ انگليا پرەمەر-ليگاسىنىڭ قارقىنى مەن فيزيكالىق تالاپتارىنا دايىندىعى تۋرالى سۇراققا الونسو قازاقستاندىق ويىنشىنىڭ ەرەكشەلىكتەرىن اتاپ ءوتتى. «ول فيزيكالىق تۇرعىدان وتە مىقتى ءارى وتە جىلدام. مەنىڭ ويىمشا، ول سىزدەردى شىنىمەن تاڭ قالدىرادى»، — دەپ قوستى الونسو.
ساتپاەۆتىڭ 2026/27 ماۋسىمىنداعى بولاشاعى تۋرالى تۇپكىلىكتى شەشىم ازىرگە جاريالانبادى. ماۋسىم الدىنداعى دايىندىق قورىتىندىسى بويىنشا باپكەرلەر شتابى قازاقستاندىق ويىنشىنىڭ نەگىزگى كوماندادا قالاتىنىن نەمەسە جالعا بەرىلەتىنىن انىقتايدى. «چەلسي» شابۋىل شەبىندەگى باسەكە جوعارى بولىپ قالادى: الونسونىڭ قاراماعىندا جواۋ پەدرو، ليام دەلاپ، دجەيمي گيتتەنس، كوۋل پالمەر، ەستەۆاو جانە پەدرۋ نەتۋ، سونداي-اق جاڭا ويىنشىلار دجوۆانني كەندا مەن ەممانۋەل ەمەگا بار.
سونىمەن قاتار، Sky Sport Germany ءجۋرناليسى فلوريان پلەتتەنبەرگ «چەلسي» «برايتونمەن» دەنني ۋەلبەكتىڭ ترانسفەرى بويىنشا تولىق كەلىسىمگە كەلگەنىن حابارلادى. 35 جاستاعى شابۋىلشى «اريستوكراتتارمەن» 2028 جىلعا دەيىن كەلىسىمشارتقا وتىرادى دەپ كۇتىلۋدە.