قازاقستاندا 2027 جىلى اۋقىمدى كيبەرجاتتىعۋلار وتكىزۋ جوسپارلانىپ وتىر. وعان ەلدەگى ءىرى بانكتەر قاتىسادى. رەتتەۋشى ولاردىڭ كيبەرشابۋىلدارعا قارسى تۇرۋ قابىلەتىن تەكسەرمەك، دەپ حابارلايدى infohub.kz سايتى.
بۇل تۋرالى قارجى نارىعىن رەتتەۋ جانە دامىتۋ اگەنتتىگى (قناردا) ءتوراعاسىنىڭ ورىنباسارى تيمۋر ءابىلقاسىموۆ KazHackStan 2026 الاڭىندا مالىمدەدى.
«سيفرلىق ستراتەگيا مەن قارجى نارىعىنا جاساندى ينتەللەكتتى جاپپاي ەنگىزۋ اياسىندا بىزدە قاداعالاۋ باعاسى بار. ءبىرىنشىسى – كورپوراتيۆتىك باسقارۋ. بۇل – بانكتەردىڭ رەسۋرستارىن، ولاردىڭ كوماندالارىن، كادرمەن قامتاماسىز ەتىلۋ دەڭگەيىن جانە پروسەستەردىڭ قالاي قۇرىلعانىن باعالاۋ. ەكىنشىسى – اۋقىمدى كيبەرجاتتىعۋلار. كەلەسى جىلى قاداعالاۋ جاتتىعۋى رەتىندە اۋقىمدى كيبەرجاتتىعۋلار جوسپارلانىپ وتىر، وعان بانك سەكتورى اكتيۆتەرىنىڭ شامامەن 90%-ىن قۇرايتىن ءىرى بانكتەر قاتىسادى»، – دەدى قناردا ءتوراعاسىنىڭ ورىنباسارى.
ءابىلقاسىموۆتىڭ ايتۋىنشا، پيلوتتىق كەزەڭ اياسىندا اگەنتتىك بانكتەردىڭ كيبەرشابۋىلدارعا قارسى تۇرۋعا دايىندىعىن عانا ەمەس، مۇنداي شابۋىلدار ءساتتى بولعان جاعدايدا جۇيەلەرىنىڭ جۇمىسىن جەدەل قالپىنا كەلتىرۋ قابىلەتىن دە تەكسەرىپ ۇلگەرگەن.
بولاشاقتا مۇنداي جاتتىعۋلار بانكتەردىڭ كيبەرتوزىمدىلىگىن باعالايتىن قۇرالعا اينالادى.