الماتىدا قالا كۇنىن مەرەكەلەۋ اياسىندا «كىتاپFest» قالالىق كىتاپ جارمەڭكەسى اشىلدى. ول ادەبيەت پەن وقىرماندى بىرىكتىردى، دەپ حابارلايدى infohub.kz سايتى.
ەكى كۇنگە سوزىلاتىن مادەني شارانىڭ العاشقى كۇنى اربات الاڭىندا قالا تۇرعىندارى مەن قوناقتارى ادەبيەت الەمىنە ەنىپ، جازۋشىلارمەن كەزدەسىپ، جاڭا كىتاپتارمەن تانىسۋ مۇمكىندىگىنە يە بولدى.
بيىلعى جارمەڭكەگە 60-تان استام باسپا قاتىسىپ، وقىرماندارعا ءارتۇرلى جانرداعى جاڭا جانە تاڭداۋلى باسىلىمدارىن ۇسىندى. كەلۋشىلەر وزدەرىنە ۇنايتىن كىتاپتاردى تاڭداپ قانا قويماي، وتاندىق اۆتورلارمەن جۇزدەسىپ، ولارمەن اڭگىمەلەسىپ، شىعارماشىلىقتارىن تالقىلاي الادى.
جارمەڭكەنىڭ ءبىرىنشى كۇنى تانىمال اقىن-جازۋشىلارمەن ادەبي كەزدەسۋلەر وتۋدە. كەزدەسۋگە قاتىسۋشىلار شىعارماشىلىق تۋرالى ويلارىمەن، وقۋ مادەنيەتىنىڭ ماڭىزى مەن قازىرگى وقىرمانداردىڭ تالعامى تۋرالى ءبولىسىپ، قوناقتاردىڭ سۇراقتارىنا جاۋاپ بەرۋدە.
كەزدەسۋ بارىسىندا جازۋشى جانە دراماتۋرگ الىشەر راحات الماتىلىقتاردى قالا كۇنىمەن قۇتتىقتاپ، «كىتاپFest» وقىرماندار مەن جازۋشىلاردى، سونداي-اق ادەبيەت قاۋىمداستىعى مەن قالا تۇرعىندارىن جىل سايىن بىرىكتىرەتىن ماڭىزدى مادەني الاڭ ەكەنىن اتاپ ءوتتى.
جارمەڭكەگە كەلگەن الماتىلىقتار ۇسىنىلعان كىتاپتار مەن اۆتورلارمەن كەزدەسۋلەرگە ۇلكەن قىزىعۋشىلىق تانىتۋدا.
«بۇگىن مەن كىتاپ جارمەڭكەسىنە ارنايى كەلدىم. مۇندا ءارتۇرلى جانرداعى كىتاپتار كوپ، وزىمە ۇناعان بىرنەشە كىتاپتى تاۋىپ قويدىم. اسىرەسە وتاندىق اۆتورلارمەن كەزدەسىپ، ولاردىڭ شىعارمالارى تۋرالى تىكەلەي وزدەرىنەن ەستۋ قىزىقتى بولدى»، — دەدى الماتىلىق ستۋدەنت اسىلجان باۋىرجان ۇلى.
الماتىدا وقۋعا دەگەن قىزىعۋشىلىقتى ارتتىرىپ، وقىرماندار مەن ادەبيەت قاۋىمداستىعى اراسىنداعى بايلانىستى نىعايتۋعا باعىتتالعان جوبالار تۇراقتى تۇردە جۇزەگە اسىرىلىپ كەلەدى. «كىتاپFest» كىتاپ جارمەڭكەسى وسىنداي مادەني باستامالاردىڭ بىرىنە اينالدى. مۇنداي شارالار وقۋ مادەنيەتىن دامىتۋعا، وتاندىق ادەبيەتتى ناسيحاتتاۋعا جانە قالانىڭ مادەني ءومىرىن بايىتۋعا ىقپال ەتەدى.
ەسكە سالايىق، «كىتاپFest» قالالىق كىتاپ جارمەڭكەسى 19–20 قىركۇيەكتە ساعات 10:00-دەن 18:00-گە دەيىن اربات الاڭىندا وتەدى. الماتى تۇرعىندارى مەن قوناقتارىن جارمەڭكەگە كەلىپ، ونىڭ باعدارلاماسىنا قاتىسۋعا شاقىرامىز.