جۇڭگو مەن نەپال شەكاراسىنداعى سەل سالدارىنان قازا تاپقاندار سانى 43 ادامعا جەتتى، تاعى 519 ادام حابار-وشارسىز تىزىمدە تۇر، دەپ حابارلايدى infohub.kz سايتى.
«سينحۋا» اگەنتتىگىنىڭ دەرەگىنشە، قىتايدىڭ سيسزان اۆتونوميالىق اۋدانىنداعى گيرونگ وتكىزۋ بەكەتى اۋدانىندا اۋقىمدى ىزدەۋ-قۇتقارۋ جۇمىستارى جالعاسۋدا. جەرگىلىكتى توتەنشە جاعدايلار شتابى حابار-وشارسىز كەتكەندەردىڭ اراسىندا 23 ەلدىڭ 261 شەتەل ازاماتى بار ەكەنىن مالىمدەدى.
بۇل ساندار شەتەلدىك جانە قىتايلىق جۋرناليستەرگە ارنالعان ءباسپاسوز ءماسليحاتىندا جاريالاندى. بۇقارالىق اقپارات قۇرالدارىنىڭ وكىلدەرى گيرونگ وتكىزۋ بەكەتى اۋدانىنداعى اپات ايماعىنا دا باردى.
«قۇتقارۋ جۇمىستارىنا 2500-دەن استام ادام مەن 500-دەن استام تەحنيكا جۇمىلدىرىلىپ، ۇشقىشسىز ۇشۋ اپپاراتتارىنىڭ 1 مىڭنان استام رەيسى جاسالىپ، اۋەدەن 5،43 توننا جۇك تاستالدى»، — دەلىنگەن شتاب حابارلاماسىندا.
گيرونگ ۋەزىنىڭ بيلىگى اۋماعىندا قالعان نەپالدىڭ شەكارالاس اۋداندارىنىڭ 1720 تۇرعىنىنا كومەك كورسەتتى.
ەسكە سالايىق، 26 تامىزدا كۇشتى تاسقىن سالدارىنان مىڭداعان ادام حابار-وشارسىز كەتكەنى تۋرالى حابارلانعان بولاتىن. سوڭعى مالىمەتتەر بويىنشا، نەپالداعى تابيعي اپاتتان كەمىندە 1003 ادام قازا تاپتى.
سونىمەن قاتار، نەپال مەن جۇڭگو شەكاراسىنداعى تابيعي اپات ايماعىنان ءۇش قازاقستاندىق ايەل ىزدەستىرىلۋدە.