اقتوبە وبلىسىندا 16 ءوڭىر تۇرعىنى زارداپ شەككەن ءىرى ينتەرنەت-الاياقتىق سحەماسى انىقتالدى، دەپ حابارلايدى infohub.kz.
اقتوبە وبلىسى بويىنشا قما دەپارتامەنتىنىڭ قىزمەتكەرلەرى ينتەرنەت-الاياقتىققا جاردەمدەسۋ، زاڭسىز كاسىپكەرلىك، دروپپەرلىك جانە قىلمىستىق كىرىستەردى زاڭداستىرۋ فاكتىلەرى بويىنشا قىلمىستىق ءىستى تەرگەپ جاتىر.
"تەرگەۋ دەرەكتەرى بويىنشا، اقتوبە قالاسىندا تەلەفون جانە ينتەرنەت-الاياقتىعى ناتيجەسىندە ازاماتتاردان ۇرلانعان اقشانى قابىلداۋ، ايىرباستاۋ جانە جىلىستاتۋدىڭ تۇراقتى سحەماسىن قۇرعان قىلمىستىق توپ ارەكەت ەتكەن. توپ قۇرامىنا وننان استام ادام كىرگەن. قىلمىستىق سحەمانى جۇزەگە اسىرۋ ءۇشىن ۇيىمداستىرۋشىلار 150-دەن استام دروپپەردى تارتقان"، — دەلىنگەن قارجى مونيتورينگى اگەنتتىگىنىڭ رەسمي Telegram-ارناسىندا.
توپ مۇشەلەرى الدىن الا دايىندالعان بانك قوسىمشالارى مەن كريپتوامياندارى بار ۇيالى تەلەفونداردى پايدالانعان. بۇل دروپپەرلەردىڭ شوتتارىن قاشىقتان باسقارۋعا جانە ولاردىڭ قاتىسۋىنسىز قارجىلىق وپەراسيالاردى جۇرگىزۋگە مۇمكىندىك بەرگەن. بلوكچەين-اناليتيكا قۇرالدارىنىڭ كومەگىمەن ۇرلانعان قاراجاتتى زاڭداستىرۋدىڭ تولىق سحەماسى قالپىنا كەلتىرىلدى.
"الدىمەن جابىرلەنۋشىلەردىڭ اقشاسى ترانزيتتىك بانك شوتتارى ارقىلى ءوتىپ، كەيىن باقىلاۋداعى دروپپەرلەردىڭ شوتتارىنا تۇسكەن. ودان سوڭ ولار كريپتوۆاليۋتالىق پلاتفورماعا جىبەرىلىپ، USDT سيفرلىق اكتيۆتەرىن ساتىپ الۋعا جۇمسالعان. وپەراسيالارعا زاڭدىلىق سيپاتىن بەرۋ ءۇشىن جالعان نەسيە كەلىسىمشارتتارى مەن نومينالدى كومپانيالار پايدالانىلعان. سوڭعى كەزەڭدە قىلمىستىق كىرىستەر قولما-قول اقشاعا اينالدىرىلىپ، شەتەل ۆاليۋتاسىنا اۋىستىرىلعان"، — دەپ قما تولىق مالىمدەدى.
قازىرگى ۋاقىتتا ەلدىڭ 16 وڭىرىنەن 80 جابىرلەنۋشى انىقتالدى. زارداپ كولەمى 120 ملن تەڭگەدەن استى. توپتىڭ 8 مۇشەسى قاماۋعا الىندى، ەكى كۇدىكتىگە قاتىستى ءۇي قاماعى تۇرىندەگى بۇلتارتپاۋ شاراسى تاڭدالدى. سوت سانكسياسىمەن كۇدىكتىلەردىڭ مۇلكىنە، ونىڭ ىشىندە 8 پاتەر، اۆتوكولىك جانە 52 مىڭ USDT كولەمىندەگى سيفرلىق اكتيۆتەرگە تىيىم سالىندى. تەرگەۋ جالعاسۋدا.