كوك شايدى ۇنەمى ءىشۋ قارتايۋ پروسەسىندە دەنساۋلىقتى ساقتاۋعا كومەكتەسەدى، دەپ جازادى Prevention. بۇل سۋسىن ەجەلدەن پايدالى قاسيەتتەرىمەن تانىمال، ال عالىمدار ونىڭ اعزاعا اسەرىنىڭ جاڭا قىرلارىن اشۋدا. انتيوكسيدانتتار مەن وسىمدىك قوسىلىستارىنا باي كوك شاي قابىنۋ پروسەستەرىن باقىلاۋعا كومەكتەسەدى، يممۋنيتەتتى نىعايتادى جانە ءقاۋىپتى اۋرۋلاردىڭ دامۋىنا جول بەرمەيدى، دەپ حابارلايدى infohub.kz.
كوك شايدىڭ باستى ارتىقشىلىقتارىنىڭ ءبىرى — مي جۇمىسىن قولداۋ. قۇرامىنداعى L-تەانين امينقىشقىلى مازاسىزدىقتى تومەندەتىپ، زەيىندى ارتتىرادى جانە كوفەيننىڭ جاناما اسەرلەرىن باسەڭدەتەدى. جاپونيالىق زەرتتەۋشىلەر كۇنىنە ەكى-ۇش كەسە شاي ءىشۋ كوگنيتيۆتى بۇزىلۋلار مەن السگەيمەر اۋرۋىنىڭ دامۋ ءقاۋپىن تومەندەتەتىنىن انىقتادى.
سونىمەن قاتار، عالىمدار بۇل سۋسىندى ينسۋلت پەن جۇرەك-قان تامىرلارى اۋرۋلارىنىڭ الدىن الۋمەن بايلانىستىرادى. شاي «جامان» LDL حولەستەرين دەڭگەيىن تومەندەتۋگە جانە قان قىسىمىن قالىپقا كەلتىرۋگە كومەكتەسەدى. كوك شايدى ۇنەمى ءىشۋ ينسۋلت ىقتيمالدىعىن 21%-عا ازايتۋى مۇمكىن. قۇرامىنداعى كاتەحيندەر مەن پوليفەنولدار جاسۋشالاردى بوس راديكالداردىڭ اسەرىنەن قورعاپ، كەيبىر قاتەرلى ىسىك تۇرلەرىنىڭ پايدا بولۋ ءقاۋپىن تومەندەتەدى.
جۇڭگو مەن ۇلىبريتانيا تۇرعىندارىنىڭ قاتىسۋىمەن جۇرگىزىلگەن زەرتتەۋلەر شايدىڭ جالپى ءولىم-جىتىمدى ازايتۋعا جانە اعزانىڭ بيولوگيالىق قارتايۋىن باياۋلاتۋعا ىقپال ەتەتىنىن كورسەتتى. سونىمەن قاتار، قانتسىز كوك شاي سالاۋاتتى سالماقتى ساقتاۋعا كومەكتەسەدى، قۇرامىندا قانت كوپ سۋسىندارعا پايدالى بالاما بولا الادى.