كوك-جايلاۋ اۋماعىندا 2 مىڭعا جۋىق شرەنك شىرشاسى وتىرعىزىلدى. بۇل اكسيا Almaty SuperSki جوباسىن جاستارمەن تالقىلاۋدىڭ جالعاسى بولدى: بۇعان دەيىن ستۋدەنتتەر بۇل اۋماقتاعى وزگەرىستەردى قۇرىلىس جۇمىستارىنان ەمەس، كوگالداندىرۋدان باستاۋدى ۇسىنعان ەدى، دەپ حابارلايدى infohub.kz سايتى.
اعاش وتىرعىزۋعا ستۋدەنتتەر، عالىمدار، ەكولوگيا جانە تابيعي رەسۋرستار ءمينيسترى الىبەك قۋانتىروۆ، الماتى اكىمى دارحان ساتىبالدى جانە Kazakh Tourism Development باس اتقارۋشى ديرەكتورى ەرجان ەركىنبايەۆ قاتىستى. كوشەتتەردى كومپانيا قازاقستاندىق پيتومنيكتەردەن ساتىپ العان.
«ءبىزدىڭ ۇستانىمىمىز قاراپايىم: كەز كەلگەن دامۋ تابيعاتقا قۇرمەتتەن باستالۋى كەرەك. سوندىقتان Almaty SuperSki جوباسىن ىسكە اسىرۋدىڭ كەلەسى كەزەڭدەرىنە دەيىن ءبىز ناقتى ەكولوگيالىق ارەكەتتەردەن باستايمىز. جاڭا اعاشتار وتىرعىزۋ – سول قادامداردىڭ ءبىرى»، – دەدى ەرجان ەركىنبايەۆ.
ءبىرىنشى اعاشتى بىرلەسىپ وتىرعىزعان سوڭ، قاتىسۋشىلار الدىن الا بەلگىلەنگەن ۋچاسكەلەرگە ءبولىنىپ، جاپپاي وتىرعىزۋعا كىرىستى.
جوبا توڭىرەگىندەگى باستى ماسەلەلەردىڭ ءبىرى – قازىرگى جاسىل جەلەكتەرگە قاتىستى. ەكولوگيا ءمينيسترى الىبەك قۋانتىروۆتىڭ ايتۋىنشا، الىپ تاستاۋعا تۋرا كەلەتىن ءاربىر اعاش ءۇشىن ون ەسەلىك وتەماقى قاراستىرىلعان.
«ءبىر اعاش الىنعان جاعدايدا ون اعاش وتىرعىزۋ ارقىلى وتەماقى قامتاماسىز ەتىلەدى. سونىمەن قاتار، تۋريستىك كلاستەر ىسكە اسىرىلاتىن ايماقتا قىزىل كىتاپقا ەنگەن بىردە-بىر اعاش كوشىرىلمەيدى نەمەسە الىنبايدى»، – دەدى مينيستر.
Kazakh Tourism Development كومپانياسى جوبا اۋدانىندا 13 سيۆەرس الما اعاشى بار ەكەنىن جانە ولاردىڭ ورنالاسقان جەرى ازىرلەۋشىلەرگە بەلگىلى ەكەنىن ناقتىلايدى.
«ءبىز ولاردىڭ ءارقايسىسىن ناقتى بىلەمىز، ناقتى كوورديناتتارىمىز بار، ولار بۇزىلمايدى، كوشىرىلمەيدى جانە كەسىلمەيدى»، – دەدى ەركىنبايەۆ.
سونىمەن قاتار، اۋماقتىڭ ءبىر بولىگىندە ادام قولىمەن وتىرعىزىلعان ەۋروپالىق شىرشالار وسەدى. ولار ەندەميكالىق نەمەسە قىزىل كىتاپقا ەنگەن تۇرلەرگە جاتپايدى. كومپانيادا كۋرستىڭ جوسپارى وسى اعاشتاردىڭ بارىنشا كوبىن ساقتاپ قالۋعا بەيىمدەلىپ جاتقانىن ايتادى. قاجەت بولسا، ءبىر بولىگى كوشىرىلەدى، ءبىر بولىگى سانيتارلىق كەسۋگە ىلىگۋى مۇمكىن.
Almaty SuperSki جوباسىنىڭ نەگىزگى كوممەرسيالىق ايماعى كومپانيانىڭ مالىمەتىنشە، 20 گەكتاردان اسپايدى. اۋماقتى ۇلتتىق پارك قۇرامىنان شىعارۋ جوسپارلانبايدى، ال جەكە ۆيللالار مەن كوتتەدجدەر سالۋعا تىيىم سالىنعان.
الماتى اكىمى دارحان ساتىبالدى جاستاردىڭ مۇنداي باستامالارعا قاتىسۋى تەك كوگالداندىرۋعا كومەك قانا ەمەس، سونىمەن قاتار تاۋلى اۋماقتىڭ بولاشاعىن تالقىلاۋدىڭ ءبىر بولىگى ەكەنىن اتاپ ءوتتى.
«الماتى ءۇشىن جاس قالا تۇرعىندارىنىڭ قالا ومىرىنە بەلسەندى قاتىسىپ، قورشاعان ورتانى ساقتاۋعا ۇلەس قوسۋى ماڭىزدى»، – دەدى ول.
سونىمەن قاتار، كوك-جايلاۋدا عىلىمي زەرتتەۋلەر جالعاسۋدا. ماماندار فلورا مەن فاۋنانى، سۋ رەسۋرستارىن، توپىراقتى جانە ەروزيالىق پروسەستەردى، ارحەولوگيالىق نىسانداردى، سونداي-اق ىقتيمال شۋ جۇكتەمەسىن زەرتتەپ جاتىر. جۇمىسقا ءال-فارابي اتىنداعى قازۇۋ جانە باسقا دا بەيىندى ۇيىمداردىڭ عالىمدارى قاتىسۋدا.