كوكشەتاۋدا ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى اسا ءىرى مولشەردەگى مەفەدرون پسيحوتروپتىق زاتىن وتكىزۋ دەرەگىن توقتاتىپ، بۇرىن سوتتالعان، ءبىراق جازاسىن وتەۋ مەرزىمى كەيىنگە قالدىرىلعان 43 جاستاعى ەر ادامدى ۇستادى، دەپ حابارلايدى infohub.kz سايتى.
اقمولا وبلىسى پوليسيا دەپارتامەنتىنىڭ مالىمەتىنشە، ەر ادام قىلمىس ۇستىندە ۇستالعان. ءتىنتۋ بارىسىندا ودان تىيىم سالىنعان زات سالىنعان 22 وراما، سونداي-اق الدىن الا دەرەكتەر بويىنشا قۇقىققا قارسى ارەكەتكە پايدالانىلۋى مۇمكىن ۇيالى تەلەفون تاركىلەندى.
ول بۇعان دەيىن ەسىرتكى قىلمىسى ءۇشىن بىرنەشە رەت قىلمىستىق جاۋاپكەرشىلىككە تارتىلعانى اتاپ ءوتىلدى. اعىمداعى جىلدىڭ شىلدەسىندە سوت ونى تىيىم سالىنعان زاتتاردى وتكىزگەنى ءۇشىن كىنالى دەپ تانىپ، بەس جىل ءتورت ايعا باس بوستاندىعىنان ايىرۋ جازاسىن تاعايىندادى.
ەر ادامنىڭ جەسىر ەكەنىن جانە كامەلەتكە تولماعان بالانى جالعىز تاربيەلەپ وتىرعانىن ەسكەرىپ، سوت جازاسىن وتەۋ مەرزىمىن ءۇش جىلعا كەيىنگە قالدىردى.
«الايدا سوت بەرگەن مۇمكىندىكتى فيگۋرانت پايدالانباي، جازاسىن وتەۋ مەرزىمى كەيىنگە قالدىرىلعان كەزدە قايتادان زاڭسىز ارەكەتىن جالعاستىردى. ناتيجەسىندە ول ەسىرتكىنى كەزەكتى رەت وتكىزۋ كەزىندە ۇستالدى. وسى دەرەك بويىنشا قىلمىستىق ءىس قوزعالدى. سوتقا دەيىنگى تەرگەۋ كەزەڭىندە ەر ادام ۇستالىپ، ۋاقىتشا ۇستاۋ يزولياتورىنا قامالدى»، — دەدى پوليسيادا.
پوليسيادا قازىرگى تاڭدا ەسىرتكى قىلمىسى ءۇشىن جازاسىن ۇستالعان ادامنىڭ قىزى دا وتەپ جاتقانىن قوستى.
«ەسىرتكىنىڭ زاڭسىز اينالىمى قىلمىستىق جاۋاپكەرشىلىككە اكەپ سوعادى، ال قىلمىستى قايتا جاساۋ زاڭدا كوزدەلگەن جازادان بوساتپايدى»، — دەپ ەسكە سالدى قۇقىق قورعاۋ ورگاندارى.