كوكشەتاۋدا پوليسيا ويىن كلۋبىندا 40 جاستاعى ايەلدىڭ ومىرتقاسى جاراقاتتانۋىنا بايلانىستى تەرگەۋ باستادى، دەپ حابارلايدى infohub.kz.
اقمولا وبلىسى پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، سوتقا دەيىنگى تەرگەۋدى باستاۋعا 1986 جىلى تۋعان ايەلدىڭ ارىزى سەبەپ بولعان. ول كلۋبتا ويىن كەزىندە قۇلاپ، ومىرتقاسىن جاراقاتتاعانىن ايتادى.
وسى فاكتى بويىنشا ءتارتىپ ساقشىلارى قاۋىپسىزدىك تالاپتارىنا ساي كەلمەيتىن قىزمەت كورسەتۋگە قاتىستى باپ بويىنشا قىلمىستىق ءىس قوزعادى.
تەرگەۋ شارالارى بارىسىندا پوليسەيلەر ويىندى ۇيىمداستىرۋشىنى انىقتادى. ءقازىر ونىڭ وقيعاعا قاتىستى ءرولى جانە جاراقات الۋدىڭ بارلىق ءمان-جايى انىقتالۋدا.
تەرگەۋ قۇلاۋدىڭ قانداي جاعدايدا بولعانىن جانە جاراقاتتىڭ تىكەلەي ويىن كەزىندە الىنعانىن انىقتاۋى ءتيىس.
پوليسيادا سوتقا دەيىنگى تەرگەۋ قورىتىندىسى بويىنشا بارلىق قاتىسۋشىلاردىڭ ارەكەتتەرىنە تۇپكىلىكتى قۇقىقتىق باعا بەرىلەتىنىن اتاپ ءوتتى.