كوكشەتاۋدا پوليسيا شەتەلگە زاڭسىز جۇمىسقا ورنالاستىرۋعا بايلانىستى الاياقتىق ءىسىن تەرگەپ جاتىر. جەرگىلىكتى تۇرعىن رەسمي جۇمىسسىز ءجۇرىپ، بىرنەشە جىل بويى ازاماتتاردى الداپ، ۇلىبريتانياعا جۇمىسقا بارۋعا كومەكتەسەمىن دەپ ونداعان ميلليون تەڭگە جيناعان، دەپ حابارلايدى infohub.kz سايتى.
الاياقتىق سحەماسى الەۋمەتتىك جەلىلەر ارقىلى جۇزەگە اسىرىلعان. 2023 جىلدان 2026 جىلدىڭ قاڭتارىنا دەيىن كۇدىكتى ۇلىبريتانياعا بارۋعا قۇجاتتاردى راسىمدەۋ قىزمەتىن بەلسەندى تۇردە ۇسىنعان. ول جۇمىس ۆيزاسىن راسىمدەۋ، مەديسينالىق ساقتاندىرۋ، بيومەتريادان ءوتۋ جانە ءارتۇرلى الىمدار ءۇشىن اقشا العان. قاراجاتتى قولما-قول جانە اۋدارىم ارقىلى قابىلداعان، ءبىراق ۋادەلەرىنىڭ ەشقايسىسىن ورىنداماعان.
قازىرگى ۋاقىتتا ءىس بويىنشا 93 ادام جابىرلەنۋشى رەتىندە تانىلعان. الدىن الا باعالاۋ بويىنشا، جالپى شىعىن شامامەن 60 ميلليون تەڭگەنى قۇرايدى. تەرگەۋ ورگاندارى قازاقستان رەسپۋبليكاسى قىلمىستىق كودەكسىنىڭ 190-بابىنىڭ 4-بولىگى بويىنشا («اسا ءىرى كولەمدەگى الاياقتىق») قىلمىستىق ءىس قوزعادى. كۇدىكتىگە قاتىستى ءۇيقاماق تۇرىندەگى بۇلتارتپاۋ شاراسى تاڭدالدى. تەرگەۋ جالعاسۋدا.