كومپيۋتەردە ۇزاق ۋاقىت ءبىر قالىپتا وتىرۋ ساۋساقتاردىڭ ۇيۋىنا، السىزدىككە، ءتىپتى قولدىڭ اۋىرۋىنا ءجيى اكەلەدى. الايدا مامانداردىڭ ايتۋىنشا، ماسەلەنىڭ كوزى ىڭعايسىزدىق سەزىلەتىن جەردە ەمەس. شىن سەبەپتىڭ قايدا ەكەنىن فيزيوتەراپەۆت ۆلاديمير كاراسەنكو ايتىپ بەردى... دەپ حابارلايدى infohub.kz.
دارىگەردىڭ سوزىنشە، قولدىڭ ۇيۋى — اعزانىڭ سيگنالى. سەبەپتى نەرۆ تىكەلەي قىسىلاتىن جەردەن ىزدەۋ كەرەك. ال ول ءۇش جەردە قىسىلۋى مۇمكىن: بىلەكتە — تۋننەلدىك سيندروم (باس بارماق، سۇق ساۋساق جانە ورتاڭعى ساۋساق ۇييدى)؛ شىنتاقتا — كۋبيتالدى كانال سيندرومى (شىلدىر شۇمەك جانە اتى جوق ساۋساق ۇييدى)؛ مويىندا — جۇيكە تامىرىنىڭ قىسىلۋى (يىقتان ساۋساققا دەيىن بۇكىل قول ۇييدى).
ءوزىڭىزدى قالاي تەكسەرۋگە بولادى؟ «بىلەك سىناعى (كارپالدى تۋننەل سيندرومى): قولدى تەلەفون ۇستاعانداي تومەن بۇگىپ، ءبىر مينۋت ۇستاڭىز. ەگەر ۇيۋ كۇشەيسە — بۇل بىلەك. شىنتاق سىناعى (شىنتاق نەرۆى): قولدى شىنتاقتان 90° بۇگىپ، ءبىر مينۋت ۇستاڭىز. ەگەر ۇيۋ پايدا بولسا — بۇل شىنتاق»، — دەدى دارىگەر. مويىنعا كەلسەك، ونى قول ۇيىعان جاققا باستى يۋ ارقىلى تەكسەرۋگە بولادى. ەگەر ۇيۋ كۇشەيسە نەمەسە اۋىرسىنۋ پايدا بولسا، وندا قولدىڭ ۇيۋىنىڭ سەبەبى مويىندا.
سەبەپتى تاپقاننان كەيىن نە ىستەۋ كەرەك؟ كاراسەنكو اتاپ وتكەندەي، ەگەر بىلەك ۇيىسا، تىشقانمەن جۇمىس ىستەگەندە قولدىڭ ورنىن وزگەرتۋگە بولادى. سونداي-اق ەرگونوميكالىق پەرنەتاقتانى قولدانۋعا، جۇمىستا ءۇزىلىس جاساۋعا كەڭەس بەرىلەدى. ال ەگەر شىنتاق بولسا، قولدى ساعاتتاپ 90° بۇگىپ ۇستاماڭىز، جۇمىس كەزىندە شىنتاققا سۇيەنبەڭىز، ءار 15–20 مينۋت سايىن قولدى جازىڭىز، ءۇزىلىس جاساڭىز. ەگەر ماسەلە مويىندا بولسا، مونيتوردىڭ بيىكتىگىن تەكسەرۋ قاجەت (ەكراننىڭ جوعارعى ۇشتەن ءبىرى كوز دەڭگەيىندە بولۋى كەرەك)، باستى العا شىعارماڭىز، «يەكتى ارتقا تارتۋ» جاتتىعۋىن جاساڭىز.
«ەگەر ۇيۋ ۇنەمى قايتالانسا، پوزانى اۋىستىرعاننان كەيىن دە باسىلماسا نەمەسە قولدا السىزدىك پايدا بولسا — بۇل دارىگەرگە كورىنۋگە سەبەپ»، — دەپ اتاپ ءوتتى فيزيوتەراپەۆت. بۇعان دەيىن كاراسەنكو ۇيىقتار الدىندا كەيدە بۇكىل دەنەنىڭ نەگە كەنەتتەن دىرىلدەپ كەتەتىنىن تۇسىندىرگەن بولاتىن.