قونايەۆ گارنيزونىنداعى اسكەري بولىمدەردىڭ بىرىندە 2026 جىلعى 3 تامىزدا توتەنشە وقيعا بولدى: مەرزىمدى قىزمەتتەگى اسكەري قىزمەتكەر ءتورتىنشى قاباتتىڭ تەرەزەسىنەن قۇلاپ، جاراقات الدى، دەپ حابارلايدى infohub.kz سايتى.
قازاقستان رەسپۋبليكاسى قارۋلى كۇشتەرىنىڭ دەسانتتىق-شابۋىلداۋ اسكەرلەرىندە حابارلاعانداي، زارداپ شەككەن سولدات جەدەل تۇردە مەديسينالىق مەكەمەگە جەتكىزىلىپ، قاجەتتى مامانداندىرىلعان كومەك كورسەتىلۋدە. اسكەري قىزمەتكەردىڭ جاعدايى دارىگەرلەردىڭ تۇراقتى باقىلاۋىندا.
ۆەدومستۆو وقيعاعا دەيىن اسكەري قىزمەتكەر قىزمەت جاعدايىنا شاعىمدانباعانىن اتاپ ءوتتى. قارساڭىندا ول بولىمگە كەلگەن اتا-اناسىمەن كەزدەسكەن، ءبىراق ولاردان دا ەشقانداي ءوتىنىش نەمەسە ارىز تۇسكەن جوق.
وسى فاكتى بويىنشا ق ر ىشكى ىستەر مينيسترلىگىنىڭ اسكەري-تەرگەۋ باسقارماسى قىلمىستىق ءىس قوزعاپ، تەرگەۋ امالدارى جۇرگىزىلۋدە. قورعانىس مينيسترلىگى قىزمەتتىك تەكسەرۋ تاعايىنداپ، ارنايى كوميسسيا قۇرىلدى. جاعداي ەرەكشە باقىلاۋعا الىندى.
«انالار جۇرەگى» سارباز انالارى كوميتەتى» رەسپۋبليكالىق قوعامدىق بىرلەستىگى دە بولعان وقيعاعا ءۇن قاتتى. ۇيىمدا قونايەۆ قالاسىنداعى 32363 اسكەري بولىمىندە مەرزىمدى اسكەر قىزمەتكەرى ءتورتىنشى قاباتتان قۇلاپ، اۋىر جاراقات العانىن راستادى.
كوميتەت وكىلى دەرەۋ وقيعا ورنىنا بارىپ، زارداپ شەككەن سولداتتى اۋرۋحانادا كورىپ، ونىڭ اكەسى مەن اجەسىمەن، ءبولىم باسشىلىعىمەن جانە ناريادتا بىرگە بولعان ارىپتەستەرىمەن سويلەستى. كوميتەتتە قازىرگى باستى ماسەلە — سولداتتىڭ ءومىرى مەن دەنساۋلىعى ەكەنىن اتاپ ءوتىپ، وعان تەزىرەك ساۋىعىپ كەتۋىن تىلەدى.
ۇيىم تەرگەۋ اياقتالعانعا دەيىن وسەك پەن تەكسەرىلمەگەن اقپارات تاراتپاۋعا شاقىرىپ، ءاربىر ءمان-جايدىڭ قۇزىرەتتى ورگاندار تاراپىنان مۇقيات انىقتالۋى ءتيىس ەكەنىن ايتتى. كوميتەت جاعدايدى باقىلاۋدا ۇستاۋدى جالعاستىرادى.