زەرتتەۋشىلەر تاريحي پەرگامەنتتەردەن گەنەتيكالىق ماتەريال الۋدىڭ يننوۆاسيالىق ءادىسىن جاساپ شىقتى. بۇل ءادىس كونە قولجازبالارعا ەش زيان كەلتىرمەيدى. تەحنولوگيا مال شارۋاشىلىعى مەن ساۋدا تاريحىن زەرتتەۋگە جاڭا مۇمكىندىكتەر اشادى، دەپ حابارلايدى infohub.kz.
سولتۇستىك كارولينا شتاتى ۋنيۆەرسيتەتىنىڭ عالىمدار توبى تيم ستينسون مەن مەتتيۋ ءبريننىڭ جەتەكشىلىگىمەن پەرگامەنتتەردىڭ بەتىنەن دنك جيناۋدىڭ ءقاۋىپسىز ءتاسىلىن ۇسىندى. ءادىس ديۋك ۋنيۆەرسيتەتى كىتاپحاناسىنىڭ كوللەكسياسىنداعى VIII–XX عاسىرلارعا جاتاتىن 91 قولجازبادا ءساتتى سىنالدى. ۇلگىلەر انگليا مەن ەفيوپيانى قوسا العاندا، ءارتۇرلى ايماقتاردان الىنعان.
ءادىستىڭ ءمانى — پەرگامەنتتى قۇرعاق سيتولوگيالىق ششەتكامەن مۇقيات ءسۇرتۋ. بۇل قۇجاتتىڭ قۇرىلىمىن بۇزباي، بەتىندەگى جاسۋشالاردى جيناۋعا مۇمكىندىك بەرەدى. سودان كەيىن جينالعان بيوماتەريال جاڭا بۋىن سەكۆەنيرلەۋ تەحنولوگيالارى ارقىلى تالدانىپ، گەنەتيكالىق تىزبەكتەردى ءبولىپ الۋعا مۇمكىندىك بەرەدى.
Manuscript Studies جۋرنالىندا سيپاتتالعان جاڭا ءتاسىل زەرتتەۋشىلەرگە سوڭعى 1300 جىلداعى ءۇي جانۋارلارىنىڭ ەۆوليۋسياسىن، تۇقىمداردىڭ دامۋىن، مال اۋرۋلارىنىڭ تارالۋىن جانە ساۋدا تاريحىن زەرتتەۋگە مۇمكىندىك بەرەدى. ءادىس ارتەفاكتىلەرگە ەش ءقاۋىپ توندىرمەيتىندىكتەن، مۇراعاتتار مەن مۇراجايلار قۇندى قولجازبالاردى عىلىمي تالداۋعا بەلسەندى تۇردە ۇسىنا الادى.