VI دۇنيەجۇزىلىك كوشپەندىلەر ويىنىنىڭ ءۇشىنشى جارىس كۇنىندە قازاقستان قۇراماسى 12 التىن مەدال جەڭىپ الدى، دەپ حابارلايدى infohub.kz.
ۇلتتىق اۋدارىسپاق ويىنىندا (ەر ەڭيش) سالت اتتىلار ءبىرىن-بىرى اتتان تۇسىرۋگە تىرىسادى. 100 كەلىگە دەيىنگى سالماقتا سىرىم يزباساروۆ جەڭىسكە جەتىپ، كوشپەندىلەر ويىنىنىڭ ءۇش دۇركىن چەمپيونى اتاندى. تاعى ءبىر قازاقستاندىق دارىن وتكەلباي 90 كەلىگە دەيىنگى سالماقتا التىن الدى. نۇرجان ەركىن ۇلى 100 كەلىدەن جوعارى سالماقتا قولا جۇلدەگەر اتاندى.
قۇسبەگىلىك جارىسىندا قازاقستان قۇراماسى ءتورت مەدال جەڭىپ الدى. سەرىكبولسىن جالعاس ۇلى قىرعيمەن سايىستا ۇزدىك اتاندى. ارمان كوشكاروۆ بۇركىتپەن ونەر كورسەتىپ، كۇمىس جۇلدەگە يە بولدى. باقداۋلەت باباجان سۇڭقارمەن سايىستا كۇمىس، ال بۇل سىندا تاعى ءبىر قازاقستاندىق ەرلان كەنجەتايەۆ قولا مەدال الدى.
سامبودان بولات ساپار 98 كەلىدەن جوعارى سالماقتا جەڭىسكە جەتتى. ەركەبۇلان نىعمەتوۆ (79 كەلىگە دەيىن) پەن جاندوس بەيسەنبايەۆ (64 كەلىگە دەيىن) قولا مەدال يەلەندى.
قىرعىز كۇرەسىنەن قازاقستاندىق الماس جۇماعالي فينالدا جەڭىلىپ، 100 كەلىدەن جوعارى سالماقتا كۇمىس جۇلدەگەر اتاندى.
قول كۇرەسىنەن ۇلتتىق قۇراما ءبىر كۇندە جەتى التىن مەدال جەڭىپ الدى. چەمپيون اتانعاندار: نۇرداۋلەت ايدارحان (90 كەلىگە دەيىن، سول جانە وڭ قول)، مەدەت قۇتتىمىراتوۆ (90 كەلىدەن جوعارى، سول جانە وڭ قول)، مالەنا سىدىقجان (65 كەلىدەن جوعارى، سول جانە وڭ قول) جانە دانيل ۋستينوۆ (80 كەلىگە دەيىن، سول قول). سونداي-اق بۇل سىندا كوماندانىڭ قورجىنىندا تاعى بەس مەدال بار: ۇلجان ورالباي ەكى كۇمىس (65 كەلىگە دەيىن، سول جانە وڭ قول)، ۋستينوۆ ءبىر كۇمىس (وڭ قول)، باقىت اقجىگىتوۆ ءبىر كۇمىس جانە ءبىر قولا (70 كەلىگە دەيىن، سول جانە وڭ قول).
تاعى ءبىر التىندى قازاقستان قۇراماسى ارقان تارتۋدان جەڭىپ الدى: بەيسەنبىدە ولار 4ح4 فورماتىندا ۇزدىك اتانسا، الدىڭعى كۇنى 8ح8 تۋرنيرىندە جەڭىسكە جەتكەن ەدى.
كوشپەندىلەر ويىنى قىرعىزستاندا 6 قىركۇيەككە دەيىن جالعاسادى.