قىرعىزستاندا ءوتىپ جاتقان VI دۇنيەجۇزىلىك كوشپەندىلەر ويىندارىندا تاعى ءبىر جارىس كۇنى اياقتالدى. قازاقستان قۇراماسى جالپى ەسەپتە كوش باستاپ تۇر، دەپ حابارلايدى infohub.kz.
ءتورتىنشى جارىس كۇنى ۇلتتىق قۇراما توعىز التىن مەدال جەڭىپ الدى. ەرنۇر سۇلەيمەن 60 كەلىگە دەيىنگى سالماق دارەجەسىندە قازاق كۇرەسىنەن چەمپيون اتاندى. ءداستۇرلى ساداق اتۋدان اسەمگۇل عالىمجانوۆا مەن اياش قابدوللاەۆا التىن الدى. قانات باقتىباي ات ۇستىندەگى ۇلتتىق ويىن — تەڭگە ىلۋدەن ۇزدىك شىقتى. مەيىر راحمەتقالييەۆ ارقان تارتۋدان جەكە سىندا جەڭىسكە جەتتى. بۇعان دەيىن ول 8ح8 جانە 4ح4 كوماندالىق جارىستاردا دا التىن العان بولاتىن.
ات جارىسىندا ءتورت قازاقستاندىق ەڭ جوعارعى ساتىعا كوتەرىلدى. كوشپەندىلەر ويىندارىنىڭ چەمپيوندارى اتانعاندار: نۇراسىل بەكباتىر (الامان بايگە، 25 شاقىرىم)، سانجار ومەكەي (قۇنان بايگە، 12 شاقىرىم)، رامازان تابىلدييەۆ (ۇشقىر بايگە، 2،4 شاقىرىم) جانە كاريمجان قۇربانجانوۆ (ۇشقىر بايگە، 3،2 شاقىرىم).
سونىمەن قاتار، جۇما كۇنى قازاقستاندىقتار بەس كۇمىس جانە جەتى قولا مەدال جەڭىپ الدى. قازاقستان قۇراماسىنىڭ قورجىنىندا ءقازىر 55 مەدال بار (25 التىن، 13 كۇمىس، 17 قولا). كوماندا جالپى ەسەپتە جارىس يەلەرى — قىرعىزستاندىقتاردى (23 التىن، 24 كۇمىس، 11 قولا) باسىپ وزدى.
كوشپەندىلەر ويىندارى 6 قىركۇيەككە دەيىن جالعاسادى.