VI دۇنيەجۇزىلىك كوشپەندىلەر ويىندارىنىڭ ءبىرىنشى كۇنىندە قازاقستان قۇراماسى وردو، توگۋز كورگوول، كۋراش، گورەش جانە مونگول بوحە سىندى بەس ءتۇرلى باعىتتا سىنعا ءتۇستى، دەپ حابارلايدى infohub.kz سايتى.
جارىستار قىرعىزستاندا 31 تامىز بەن 6 قىركۇيەك ارالىعىندا وتۋدە. قازاقستاننان 152 سپورتشى قاتىسىپ، ولار 42 سپورت تۇرىنەن ب ا ق سىنايدى.
ءبىرىنشى كۇنى قازاقستاندىقتار وردو (اسىق اتۋ)، توگۋز كورگوول (توعىزقۇمالاق)، كۋراش، گورەش جانە مونگول بوحەدەن ونەر كورسەتتى. ءۇش كۇرەس تۇرىنەن جارىستار اياقتالدى.
مونگول بوحەدە سىنعا تۇسكەن ەراسىل امانگەلدى مەن گورەشتە ب ا ق سىناعان ماديار ابدراحمانوۆ قارسىلاستارىنان ۇتىلدى.
توگۋز كورگوول جارىستارى 6 قىركۇيەككە دەيىن جالعاسادى، ال وردو بويىنشا فينالدىق ويىندار 2 قىركۇيەككە جوسپارلانعان.
ويىنداردىڭ ەكىنشى كۇنىندە قازاقستاندىق سپورتشىلار كوكپار، كوكبورى، ەر ەڭيش (اۋدارىسپاق)، الىش، وۆاري، مانگالا، توگۋز كورگوول، ات جارىسى، وردو، قۇس سالۋ، جامبى اتۋ، ءداستۇرلى ساداق اتۋ، ماسس-رەستلينگ، ارقان تارتۋ، سۋمو، سترونگمەن جانە جىلىك سىندىرۋدان سىنعا تۇسەدى.
اشىلۋ سالتاناتىندا قازاقستاننىڭ مەملەكەتتىك تۋىن كوكپاردان الەم چەمپيونى، ۇلتتىق قۇراما كاپيتانى تۇرعانبەك قۇرمانبەك كوتەردى.
بۇعان دەيىن «كۋرسيۆ» VI دۇنيەجۇزىلىك كوشپەندىلەر ويىندارىنىڭ «بىشكەك-ارەنا» ستاديونىندا وتكەن اشىلۋ سالتاناتى الەۋمەتتىك جەلىلەردە كەڭ رەزونانس تۋدىرعانىن جازعان بولاتىن. شوۋدى دايىنداۋعا قازاقستاندىق Wakeuphana كومانداسى رەجيسسەر-قويۋشى اندرەي حۆاننىڭ جەتەكشىلىگىمەن، سونداي-اق تەحنيكالىق جانە ۆيزۋالدى بولىگىنە جاۋاپتى Upstage جانە Filmotion كومپانيالارى قاتىستى.
قويىلىمعا قازاقستان، قىرعىزستان، وزبەكستان جانە رەسەيدەن شامامەن 2 مىڭ ءبيشى تارتىلدى. كورەرمەندەردىڭ ەرەكشە نازارىن قار بارىسى مەن قۇس بەينەلەرى قامتىلعان اۋقىمدى ساحنالىق ەلەمەنتتەر اۋداردى.