قوستاناي وبلىسىنىڭ ەكونوميكالىق سوتى وبلىس ورتالىعىنىڭ اكىمىنىڭ قوستاناي – رۋدنىي باعىتىندا قىزمەت كورسەتەتىن كاسىپكەرگە قاتىستى تالاپ ارىزىن قارادى، دەپ حابارلايدى infohub.kz سايتى.
قوستاناي وبلىستىق سوتىنىڭ ءباسپاسوز قىزمەتىنىڭ مالىمەتىنشە، قوستاناي وبلىسىنىڭ مامانداندىرىلعان اۋدانارالىق ەكونوميكالىق سوتى قوستاناي قالاسىنىڭ اكىمىنىڭ جەكە كاسىپكەر ب.-عا قاتىستى جولاۋشىلار مەن جۇكتى تۇراقتى اۆتوموبيل تاسىمالىن ۇيىمداستىرۋ شارتىن بۇزۋ تۋرالى تالاپ ارىزى بويىنشا ازاماتتىق ءىستى قارادى.
سوت وتىرىسى بارىسىندا تاراپتار داۋدى مەدياسيا تارتىبىمەن رەتتەدى. كەلىسىم شارتتارى بويىنشا جەكە كاسىپكەر ب. №120 قوستاناي – رۋدنىي قاتىناسىنداعى تۇراقتى قالا ماڭى باعىتىنا 2026 جىلدىڭ 31 جەلتوقسانىنا دەيىن قىزمەت كورسەتۋدى جالعاستىرادى، دەلىنگەن سوت حابارلاماسىندا.
2027 جىلدىڭ 1 قاڭتارىنان باستاپ شارت تاراپتاردىڭ ءوزارا كەلىسىمى بويىنشا توقتاتىلادى. جاۋاپكەر شارتتىڭ توقتاتىلۋىن سوت تارتىبىمەن داۋلاماۋعا، سونداي-اق شارت مەرزىمى اياقتالعاننان كەيىن تالاپكەرگە م ۇلىكتىك جانە قارجىلىق تالاپتار قويماۋعا مىندەتتەندى. تالاپكەر شارتتى بۇزۋ تۋرالى تالابىنان باس تارتتى، دەپ ناقتىلادى سوتتا.
سوت كەلىسىمدى بەكىتتى، ءىس بويىنشا ءىس جۇرگىزۋ توقتاتىلدى. №120 قوستاناي – رۋدنىي باعىتى 2026 جىلدىڭ سوڭىنا دەيىن جۇمىسىن جالعاستىرادى. سوت ۇيعارىمى زاڭدى كۇشىنە ەنگەن جوق.