قوستانايدا سوت ەڭبەك شارتى بولماسا دا، ەڭبەك قارىم-قاتىناسىن تانىدى. اۋىر وندىرىستىك جاراقات العان ەر ادامعا 3 ملن تەڭگە وتەماقى تولەنەدى. بۇل تۋرالى infohub.kz سايتى NUR.KZ-گە سىلتەمە جاساپ حابارلايدى.
قوستاناي وبلىسى سوتتارىنىڭ رەسمي Telegram-ارناسىندا حابارلانعانداي، قوستاناي قالالىق سوتى ەر ادامنىڭ جشس-كە قاتىستى ەڭبەك قارىم-قاتىناسىنىڭ بولعانىن تانۋ، مورالدىق زياننىڭ وتەماقىسىن جانە جوعالتقان تابىسىن ءوندىرىپ الۋ تۋرالى تالاپ ارىزى بويىنشا ازاماتتىق ءىستى قارادى.
سوت انىقتاعانداي، تالاپكەر 2026 جىلدىڭ اقپان ايىنان باستاپ جاۋاپكەردىڭ وندىرىستىك نىسانىندا ەڭبەك شارتىن رەسىمدەمەي، ديىرمەنشى مىندەتىن اتقارعان. 2026 جىلعى 30 ناۋرىزدا ەڭبەك مىندەتىن ورىنداۋ كەزىندە ول اۋىر وندىرىستىك جاراقات — سول قولىنىڭ بىرنەشە ساۋساعىنىڭ جاراقاتتىق امپۋتاسياسىن العان.
سوت وتىرىسى بارىسىندا ەڭبەك قارىم-قاتىناسىنىڭ فاكتىسى زەرتتەلگەن دالەلدەمەلەردىڭ جيىنتىعىمەن، ونىڭ ىشىندە كۋاگەرلەردىڭ ايعاقتارى، نوتاريۋس كۋالاندىرعان مەسسەندجەردەگى حات الماسۋ، اقشا اۋدارىمدارى تۋرالى مالىمەتتەر، ۇيالى بايلانىس وپەراتورلارىنىڭ تالاپكەردىڭ جۇمىس ۋاقىتىنداعى ورنالاسقان جەرى تۋرالى اقپاراتى، سونداي-اق جاۋاپكەردىڭ ناقتى وندىرىستىك قىزمەتىن كورسەتەتىن مەملەكەتتىك كىرىستەر دەپارتامەنتىنىڭ دەرەكتەرىمەن راستالدى.
ۇسىنىلعان دالەلدەمەلەردى باعالاي كەلە، سوت تالاپكەردىڭ جۇمىس بەرۋشىنىڭ رۇقساتىمەن ناقتى جۇمىسقا جىبەرىلگەنى، وسىعان بايلانىستى تاراپتار اراسىندا ەڭبەك قاتىناسى تۋىنداعان دەگەن قورىتىندىعا كەلدى.
سوت شەشىمىمەن تالاپكەردىڭ 2026 جىلعى 1 اقپاننان 31 ناۋرىزعا دەيىنگى كەزەڭدە جشس-تە ديىرمەنشى لاۋازىمىندا ەڭبەك قاتىناسىن جۇزەگە اسىرعان فاكتىسى بەلگىلەندى.
سونىمەن قاتار، جاۋاپكەردەن 3 ملن تەڭگە كولەمىندە مورالدىق زيان وتەماقىسى ءوندىرىلدى. جوعالتقان تابىستى ءوندىرىپ الۋ تۋرالى تالاپتى قاناعاتتاندىرۋدان باس تارتىلدى، سەبەبى ول مەرزىمىنەن بۇرىن قويىلعان، زاڭدا بەلگىلەنگەن تارتىپپەن وندىرىستەگى جازاتايىم وقيعا بويىنشا تەرگەۋ جۇرگىزىلمەگەن جانە كاسىبي ەڭبەككە قابىلەتتىلىگىن جوعالتۋ دارەجەسىن انىقتاۋ ءۇشىن قاجەتتى اكت جوق.
سوت شەشىمى زاڭدى كۇشىنە ەنبەگەن.