«قازاقستان تەمىر جولى» ۇلتتىق كومپانياسى (قتج) قور نارىعىنا شىعۋ اياسىندا 5 ميلليارد دوللارعا دەيىن تارتۋدى كوزدەپ وتىر. بۇل رەتتە كومپانيانىڭ جالپى قۇنى 30 ميلليارد دوللارعا دەيىن باعالانۋى مۇمكىن. بۇل تۋرالى گونكونگتىڭ etnet قارجىلىق باسىلىمى حابارلادى، وعان قازاقستاندىق مينوريتارلىق اكسيونەرلەر قاۋىمداستىعى (QAMS) نازار اۋداردى، دەپ جازادى infohub.kz سايتى.
كومپانيا ءوز اكسيالارىنىڭ 20%-عا دەيىنگى بولىگىن ورنالاستىرۋى مۇمكىن. قتج باعالى قاعازدارىنىڭ ليستينگى قازان ايىندا باستالۋى ىقتيمال، الايدا العاشقى جاريا ورنالاستىرۋدى (IPO) 2027 جىلعا شەگەرۋ نۇسقاسى دا جوققا شىعارىلمايدى. باسىلىم ساتىلاتىن پاكەتتىڭ مولشەرىن ناقتىلاماعان، دەگەنمەن بۇعان دەيىن بۇقارالىق اقپارات قۇرالدارى 20% اكسيا ۇلەسى تۋرالى جازعان بولاتىن.
ەسكە سالايىق، قتج باعالى قاعازدارىن AIX (قازاقستان)، LSE (لوندون) جانە گونكونگ قور بيرجاسىندا ورنالاستىرۋدى جوسپارلاپ وتىر. ينۆەستورلاردان تارتىلعان قاراجاتتى ۇلتتىق كومپانيا قارىزدى وتەۋگە جانە ينۆەستيسيالىق جوبالاردى ىسكە اسىرۋعا جۇمسايدى.
الايدا كومپانيانىڭ جوسپارلانعان باعاسى كاسىبي قاۋىمداستىقتا ەلەۋلى كۇمان تۋدىرىپ وتىر. QAMS سىلتەمە جاساعان Bloomberg اگەنتتىگىنىڭ دەرەگىنشە، قتج-نىڭ جالعىز اكسيونەرى – «سامۇرىق-قازىنا» ۇلتتىق ءال-اۋقات قورىنىڭ – جانە تاۋەلسىز ينۆەستيسيالىق بانكتەردىڭ باعالاۋى ايتارلىقتاي وزگەشە.
سونىمەن قاتار قتج قارىزدارعا باتقان. بۇعان دەيىن QAMS كومپانيانىڭ كرەديتتىك كەلىسىمدە بەلگىلەنگەن قارىز جۇكتەمەسى دەڭگەيىنەن (Gearing Ratio) اسىپ كەتكەنىنە نازار اۋدارعان.
قاۋىمداستىقتىڭ پىكىرىنشە، باستى اشىق سۇراق – قارىزى جوعارى جانە بيزنەسى قايتا باعالانۋى مۇمكىن كومپانيانىڭ IPO-سىنا الەۋەتتى ينۆەستورلاردىڭ قالاي قارايتىنى. اسىرەسە Air Astana تاجىريبەسى اياسىندا (اۋە تاسىمالداۋشىسىنىڭ 41،18% اكسياسى «سامۇرىق-قازىناعا» تيەسىلى)، ونىڭ اكسيالارى IPO باعاسىنا شامامەن 40% جەڭىلدىكپەن ساۋدالانىپ وتىر.
بۇعان دەيىن «كۋرسيۆ» قتج 2025 جىلدىڭ قورىتىندىسى بويىنشا تازا پايداسىن ەكى ەسەدەن استام ۇلعايتىپ، 343،6 ملرد تەڭگەگە جەتكىزگەنىن جازعان بولاتىن، ءبىر جىل بۇرىن بۇل كورسەتكىش 160،8 ملرد تەڭگە ەدى.