پرەمەر-مينيستر ولجاس بەكتەنوۆ ستراتەگيالىق نىسانداردىڭ قۇرىلىسىن سوزىپ جاتقان ەنەرگەتيكا سالاسىنىڭ باسشىلارىن، سونداي-اق ترانزيتتىك تاسىمالدار جوسپارىن ورىنداماعان «قازاقستان تەمىر جولى» (قتج) كومپانياسىن قاتاڭ سىنعا الدى. پرەمەر-مينيستر الماتىداعى جىلۋ ەلەكتر ورتالىقتارى مەن تۇركىستان وبلىسىنداعى بۋ-گاز قوندىرعىسى مەرزىمىندە ىسكە قوسىلماسا، جاۋاپكەرشىلىك جەكە قارالاتىنىن ەسكەرتتى، دەپ حابارلايدى infohub.kz.
ۇكىمەت وتىرىسىندا مينيسترلەردىڭ ەسەپتەرىن تىڭداعان بەكتەنوۆ ءبىرقاتار سالاداعى كورسەتكىشتەردىڭ قاناعاتتانارلىقسىز ەكەنىن اتاپ ءوتتى. مەتاللۋرگيادا ءوندىرىس كولەمى 2،7%-عا، ءتۇستى مەتاللۋرگيادا 6%-عا تومەندەگەن. وعان نەگىزگى سەبەپ — التىن ءوندىرۋدىڭ ازايۋى.
پرەمەر-مينيستر ونەركاسىپ جانە قۇرىلىس مينيسترلىگىنە ءبىر اي ىشىندە سالانى قولداۋدىڭ قوسىمشا تەتىكتەرىن ازىرلەۋدى تاپسىردى. سونداي-اق «تاۋ-كەن سامۋرىق» كومپانياسىمەن بىرلەسىپ، وتاندىق كاسىپورىنداردىڭ تولىق جۇكتەلۋىن قامتاماسىز ەتۋ قاجەت. ونىڭ ىشىندە قازاقستاندا يمپورتتىق التىندى اففيناجداۋ مۇمكىندىگىن پايدالانۋ كوزدەلگەن.
ۇكىمەت باسشىسى ەنەرگەتيكاداعى احۋالعا ەرەكشە نازار اۋداردى. ەنەرگەتيكا مينيسترلىگىنە جەر قويناۋىن پايدالانۋشىلارمەن مۇناي مەن گاز ءوندىرۋ جوسپارلارىن ورىنداۋ بويىنشا كەلىسسوزدەر جۇرگىزۋ، كومىردى تەرەڭ وڭدەۋ جوبالارىنا جەكە ينۆەستيسيالاردى تارتۋدى جەدەلدەتۋ جانە جاڭا ەنەرگيا نىساندارىن ۋاقتىلى ىسكە قوسۋدى قامتاماسىز ەتۋ تاپسىرىلدى.
«ەنەرگەتيكا مينيسترلىگى مەن "سامۇرىق-قازىنا" قورى باسشىلارى الماتىداعى جەو-2 مەن جەو-3، سونداي-اق تۇركىستان وبلىسىنداعى بۋ-گاز قوندىرعىسىن ۋاقتىلى ىسكە قوسۋعا جەكە جاۋاپتى ەكەنىن ەسكەرتەمىن»، — دەدى ولجاس بەكتەنوۆ.
پرەمەر-مينيستر وتكەن اپتادا جۇرگىزىلگەن تەكسەرۋ الماتىداعى جەو-3 قۇرىلىسىنىڭ باياۋ ءجۇرىپ جاتقانىن كورسەتكەنىن ايتتى. «جەو-3 بويىنشا جۇمىس بەلسەندى ەمەس. جىل سوڭىنا دەيىن ءتيىستى شارالار قابىلدانباسا، جەكە جاۋاپكەرشىلىك ماسەلەسى قارالادى. بۇل ماسەلەنى قاتاڭ باقىلاۋدا ۇستاڭىزدار»، — دەپ اتاپ ءوتتى ول.
كولىك سالاسى دا سىننان تىس قالمادى. بەكتەنوۆ قتج جۇمىسىن جەتكىلىكتى ءتيىمدى ەمەس دەپ باعالادى. كومپانياعا ترانزيتتىك تەمىرجول تاسىمالدارىن دامىتۋ جوسپارىن ورىنداۋ، نەگىزگى تەمىرجول جەلىلەرىنىڭ قۇرىلىسىن اياقتاۋ جانە ۆوكزالداردى جاڭعىرتۋدى جىل سوڭىنا دەيىن اياقتاۋ تاپسىرىلدى.
ۇكىمەت باسشىسى وڭىرلەر اراسىنداعى ساۋدا كولەمىندە ايتارلىقتاي تەڭگەرىمسىزدىك بار ەكەنىن اتاپ ءوتتى: تاۋار اينالىمىنىڭ 70%-ى نەبارى بەس وڭىرگە تيەسىلى. وسىعان بايلانىستى اكىمدەرگە ءبىر اي ىشىندە ساۋدانى دامىتۋدىڭ جول كارتالارىن دايىنداۋ تاپسىرىلدى. ولاردا باسىم ينۆەستيسيالىق جوبالار، شەكارا ماڭى ايماقتارى، تۋريستىك وڭىرلەر جانە ارنايى ەكونوميكالىق ايماقتاردىڭ الەۋەتى ەرەكشە ەسكەرىلۋى كەرەك.
ەسكە سالا كەتەيىك، ولجاس بەكتەنوۆ ماۋسىم ايىندا قتج باسشىلىعىنا ترانزيتتىك تاسىمالدار جوسپارىن ورىنداماعانى ءۇشىن جەكە جاۋاپكەرشىلىك بولاتىنىن ەسكەرتكەن ەدى. وتكەن اپتادا كومپانيانىڭ باسقارما ءتوراعاسى تالعات الدىبەرگەنوۆ قىزمەتىنەن كەتىپ، قتج باسشىسىنىڭ مىندەتىن ۋاقىتشا اتقارۋ باۋىرجان ورىنباساروۆقا جۇكتەلدى.