قازاقستاندىقتارعا تەمىرجول ساپارىندا الىپ جۇرۋگە بولاتىن ءىرى كولەمدى جۇكتى تاسىمالداۋ ءتارتىبى ءتۇسىندىرىلدى، دەپ حابارلايدى infohub.kz سايتى.
قتج ءباسپاسوز قىزمەتىنىڭ ناقتىلاۋىنشا، كادىمگى ۆاگونداردا جولاۋشى سالماعى 35 كگ-عا دەيىن جانە ولشەمى 100 × 50 × 50 سم-دەن اسپايتىن قول جۇگىن تەگىن الىپ جۇرۋگە قۇقىلى.
Talgo جانە وعان ۇقساس ۆاگونداردا سالماعى 25 كگ-عا دەيىن، ولشەمى 70 × 40 × 40 سم-دەن اسپايتىن قول جۇگىن تەگىن الىپ جۇرۋگە رۇقسات ەتىلەدى.
«ەلەكتر قوزعالتقىشى جوق ۆەلوسيپەدتى، بالالار ارباسىن جانە بايداركانى بولشەكتەپ، قاپتاپ، قول جۇگىنە ارنالعان ورىنعا سىيسا، تاسىمالداۋعا بولادى. بۇل ەرەجە Talgo ۆاگوندارىنا قولدانىلمايدى»، — دەدى قتج-دا.
ال ولشەمى بەلگىلەنگەن قول جۇگى نورماسىنان اساتىن زاتتار ءىرى كولەمدى جۇككە جاتادى. ولاردى الدىن الا باگاج رەتىندە راسىمدەۋ قاجەت. تاسىمالداۋ باگاج بولىمشەسىندە نەمەسە امبەباپ باگاج ۆاگونىندا جۇزەگە اسادى — پويىز ءتۇرى مەن ونىڭ تەحنيكالىق مۇمكىندىكتەرىنە قاراي. جولاۋشى ۆاگوندارىندا شاڭعى تاسىمالداۋعا جول بەرىلمەيدى.
«باگاج وتپە جولداردى، ەسىكتەردى جانە جولاۋشى ورىندارىن بىتەمەۋى، باسقا جولاۋشىلارعا كەدەرگى جاساماۋى ءتيىس»، — دەپ ەسكە سالدى قتج-دا.
سونىمەن قاتار جولاۋشىلاردان ارتىق قول جۇگى انىقتالسا، «تالگو» جولاۋشى پويىزدارىندا قوسىمشا اقى تولەپ، ونى باگاج ۆاگونىنا تاپسىرۋعا مۇمكىندىك بار: №67/68 نۇرلى جول — وسكەمەن؛ №9/10 نۇرلى جول — الماتى-2؛ №81/82 نۇرلى جول — ورال؛ №65/66 نۇرلى جول — قىزىلوردا.
ساپارعا شىعار الدىندا قازاقستاندىقتارعا ناقتى ءبىر جۇك ءتۇرىن تاسىمالداۋ شارتتارىن الدىن الا ناقتىلاۋ ۇسىنىلادى. قوسىمشا اقپاراتتى تاۋلىك بويى تەگىن 1433 ءنومىرى ارقىلى الۋعا بولادى.