امەريكاندىق عالىمدار جاقىندارىمەن جانە دوستارىمەن ۇنەمى قارىم-قاتىناس جاساۋ قارتايۋ پروسەسىن باياۋلاتىپ، اقىل-ويدى ۇزاق جىلدار بويى ساقتاۋعا كومەكتەسەتىنىن انىقتادى. قارتايۋ ماسەلەلەرى جونىندەگى ۇلتتىق ينستيتۋت قولداعان زەرتتەۋدى يرۆاينداعى كاليفورنيا ۋنيۆەرسيتەتىنىڭ پسيحولوگى سيۋزان چارلز باسقاردى، دەپ حابارلايدى infohub.kz سايتى.
جوبا اياسىندا ماماندار 24 پەن 97 جاس ارالىعىنداعى 2900-دەن استام ەرەسەك ادام قاتىسقان اۋقىمدى MIDUS زەرتتەۋىنىڭ دەرەكتەرىن تالداۋدى جوسپارلاپ وتىر. عالىمدار قاتىسۋشىلاردىڭ جيىرما جىل بويى جينالعان كۇندەلىك جازبالارىن، سونداي-اق دەنساۋلىق جاعدايىن كورسەتەتىن بيوماركەرلەردى زەرتتەيتىن بولادى. كورتيزول دەڭگەيىنە، قابىنۋ ماركەرلەرىنە، گەن ەكسپرەسسياسىنىڭ پروفيلدەرىنە جانە جاسۋشالىق قارتايۋ كورسەتكىشتەرىنە ەرەكشە نازار اۋدارىلادى.
اۆتورلاردىڭ پىكىرىنشە، ءتىپتى قاراپايىم ارەكەتتەر — دوسقا قوڭىراۋ شالۋ نەمەسە كورشىمەن بىرگە تۇسكى اس ءىشۋ — اقىل-وي بەلسەندىلىگىن ىنتالاندىرادى جانە سترەسستى تومەندەتەدى. ۋاقىت وتە كەلە مۇنداي قارىم-قاتىناستار جاسقا بايلانىستى وزگەرىستەردى باياۋلاتىپ، سوزىلمالى اۋرۋلاردىڭ دامۋ ءقاۋپىن ازايتا الادى. زەرتتەۋشىلەر الەۋمەتتىك بايلانىستار سپورت پەن دۇرىس تاماقتانۋ سياقتى دەنساۋلىق ءۇشىن مىندەتتى ادەتكە اينالۋى كەرەك ەكەنىن دالەلدەۋگە ۇمىتتەنەدى.