الماتى وبلىسىنىڭ تالعار اۋدانىندا تاۋدان وزدىگىنەن تۇسە الماعان تۋريستكە قۇتقارۋشىلاردىڭ شۇعىل كومەگى قاجەت بولدى. وقيعا تەڭىز دەڭگەيىنەن شامامەن 3 400 مەتر بيىكتىكتە بولعان، دەپ حابارلايدى infohub.kz سايتى.
تجم مالىمەتىنشە، ءتۋريستىڭ دەنساۋلىعى كۇرت ناشارلاپ، قيىن وتكەلدى تاۋلى ايماقتا ءتۇسۋدى جالعاستىرا الماعان. وعان كومەككە «بارىس» وڭىرلىك قۇتقارۋ قىزمەتىنىڭ قۇتقارۋشىلارى ۆەدومستۆونىڭ تىكۇشاعىمەن دەرەۋ اتتاندى. ولار زارداپ شەگۋشى ورنالاسقان №19 مورەنالىق كول اۋدانىنا باعىت الدى.
قۇتقارۋشىلار ءتۋريستى ءساتتى ەۆاكۋاسيالادى. «قازاۆياقۇتقارۋ» تىكۇشاعى الماتى قالاسىنداعى №4 قالالىق كلينيكالىق اۋرۋحانانىڭ جانىنداعى تىكۇشاق الاڭىنا قوندى. زارداپ شەگۋشى ودان ءارى مەديسينالىق مەكەمەگە جەتكىزۋ جانە قاجەتتى كومەك كورسەتۋ ءۇشىن اپاتتار مەديسيناسى ورتالىعىنىڭ بريگاداسىنا تاپسىرىلدى.
قۇتقارۋشىلار ەسكە سالادى: تاۋعا شىعار الدىندا ءوزىڭىزدىڭ فيزيكالىق دايىندىعىڭىزدى، دەنساۋلىق جاعدايىڭىزدى جانە اۋا رايى بولجامىن بايسالدى باعالاۋ قاجەت. دەنساۋلىعىڭىز ناشارلاسا، احۋال سىن كەزەڭگە جەتكەنشە كۇتپەي، دەرەۋ كومەككە جۇگىنىڭىز.