قىرعىزستان ەنەرگەتيكا مينيسترلىگى KEGOC-تىڭ قازاقستانداعى بلەكاۋت سەبەپتەرى تۋرالى مالىمدەمەسىنە جاۋاپ بەردى، دەپ حابارلايدى infohub.kz.
بۇعان دەيىن، 14 تامىزدا، KEGOC كومپانياسى قىرعىزستانداعى توقتاعۇل گەس-ىندەگى ەكى گيدروگەنەراتوردىڭ اجىراتىلۋى قازاقستان بەج-نىڭ سولتۇستىك-شىعىس-وڭتۇستىك ءترانزيتىنىڭ شامادان تىس جۇكتەلۋىنە جانە وڭتۇستىك ايماقتىڭ قازاقستان بەج-نەن جانە ورتالىق ازيا بەب (قىرعىزستان، وزبەكستان، تاجىكستان) ەنەرگوجۇيەلەرىنەن بولىنۋىنە اكەلگەنىن حابارلاعان بولاتىن.
بۇعان جاۋاپ رەتىندە قىرعىزستان ەنەرگەتيكا مينيسترلىگى ەلدىڭ ەنەرگەتيكتەرى جۇمىس رەجيمىن تۇراقتاندىرۋ ءۇشىن جەدەل شارالار قابىلداپ، ورتالىق ازيا بەب ەنەرگوجۇيەسىندەگى جيىلىكتى قىسقا مەرزىمدە قالىپتى 50 گس مانىنە قالپىنا كەلتىرگەنىن مالىمدەدى. سونىمەن قاتار، قىرعىزستاننىڭ ەنەرگوجۇيەسى كورشى مەملەكەتتەرگە شامامەن 250 مۆت قۋات بەرىپ، كومەك كورسەتكەن. الماتى ەنەرگوتۇيىنىنىڭ ءسونۋى ورتالىق ازيا بەب-دەگى جيىلىك نومينالدى ماندەردە بولعان كەزدە ورىن العان.
ۆەدومستۆو تەحنولوگيالىق بۇزىلىستىڭ ءمان-جايىن انىقتاۋ بارىسىندا توقتاعۇل گەس-ىندەگى ەكى گيدروگەنەراتوردىڭ قىسقا مەرزىمدى اجىراتىلۋى تىركەلگەنىن، بۇل پاراللەل جۇمىس ىستەپ تۇرعان ورتالىق ازيا بىرىككەن ەنەرگوجۇيەسىندە باستاپقى قوزۋ بولىپ، قۋات اعىندارىنىڭ وزگەرۋىنە جانە اۆارياعا قارسى اۆتوماتتىق جۇيەلەردىڭ ىسكە قوسىلۋىنا اكەلگەنىن اتاپ ءوتتى.
مينيسترلىك بۇل باستاپقى قوزۋدى باسقا ەلدەردەگى جەكەلەگەن ەنەرگوجۇيەلەر مەن ەنەرگوتۇيىندەردىڭ ءسونۋىنىڭ تىكەلەي سەبەبىمەن تەڭەستىرۋگە بولمايتىنىن ەرەكشە اتاپ ءوتتى. مۇنداي جاعدايلاردا ەنەرگوجۇيەلەر تەپە-تەڭدىك قالپىنا كەلگەنشە، ونىڭ ىشىندە تومەندەتىلگەن جيىلىكپەن، وقشاۋلانعان رەجيمدە تۇراقتى جۇمىستى قامتاماسىز ەتەدى. سوندىقتان باسقا ورتالىق ازيا ەلدەرىندەگى ەنەرگوتۇيىندەردىڭ ءسونۋى ءتيىستى ەنەرگوجۇيەلەردە بولعان كەيىنگى پروسەستەردى جەكە تالداۋدى تالاپ ەتەدى. بىرلەسكەن تەحنيكالىق تەرگەۋ اياقتالعانعا دەيىن اۆاريانىڭ بارلىق كەيىنگى سالدارى ءۇشىن قىرعىز ەنەرگوجۇيەسىنە جاۋاپكەرشىلىك جۇكتەۋ دۇرىس ەمەس. تەحنولوگيالىق بۇزىلىستىڭ سەبەپتەرىن ارنايى كوميسسيا تەرگەيتىن بولادى.
ەسكە سالايىق، 14 تامىزدا الماتىدا، الماتى وبلىسىندا جانە قازاقستاننىڭ باسقا ايماقتارىندا اۋقىمدى بلەكاۋت بولدى. ەنەرگەتيكا مينيسترلىگىنىڭ مالىمەتىنشە، سەبەپ — ورتالىق ازيا ەنەرگوجۇيەسى تاراپىنان ەلەكتر ەنەرگياسى اعىنىنىڭ كۇرت وزگەرۋىنەن تۋىنداعان ەنەرگوجۇيەدەگى قۋاتتىڭ ارتۋى. مەگاپوليستە باعدارشامدار جۇمىسىن توقتاتىپ، كەپتەلىستەر بايقالىپ، ادامدار قوزعالىستى رەتتەۋ ءۇشىن وزدەرى جولعا شىقتى.
ايتا كەتەيىك، الماتىداعى اۋقىمدى ەلەكتر قۋاتىنىڭ ءوشۋى كانە ۋەستتىڭ كونسەرتىنە دەيىن قيىندىق تۋعىزدى. شوۋ باستالار الدىندا كورەرمەندەرگە كونسەرتتىڭ 15 تامىزعا اۋىستىرىلعانى حابارلاندى.