قىرعىزستاننىڭ ITF تاەكۆوندو قۇراماسى الاياقتاردىڭ كەسىرىنەن ازيا چەمپيوناتىنا ۇشا المادى. جانكۇيەرلەر مەن قاراپايىم ازاماتتار سپورتشىلارعا قارجىلاي كومەك كورسەتۋدى ۇسىنىپ جاتىر، دەپ حابارلايدى infohub.kz.
قىرعىزستاننىڭ ITF تاەكۆوندو فەدەراسياسى ۆيسە-پرەزيدەنتى ساردور راحيمشايحوۆتىڭ ايتۋىنشا، كوماندا چەمپيونات الدىندا اككرەديتاسيادان ءوتۋى كەرەك ەدى، الايدا ۇشاق بيلەتتەرىنە قاتىستى الداۋ سالدارىنان ساپار بولماي قالدى. قۇراما الماتى — بەيجىڭ — ۇلان-باتىر باعىتىمەن ۇشۋدى جوسپارلاعان.
«ءقازىر ءبىزدىڭ قۇرامانىڭ چەمپيوناتقا قاتىسۋ مۇمكىندىگى وتە از، ءبىز جارتى جىلدان استام دايىندالدىق. بارلىق جاۋاپتى تۇلعالارعا، تۋروپەراتورلارعا، اۋە كومپانيالارىنا، ەل باسشىلىعىنا جۇگىنەمىز. ۇزاق ۋاقىت دايىندالعان ازيا چەمپيوناتىنا قۇرامامىزدىڭ قاتىسۋىنا كومەكتەسۋدى سۇرايمىز»، — دەدى راحيمشايحوۆ.
بىشكەك قالاسىنىڭ ءبىرىنشى مامىر اۋداندىق ىىب-نەن وقيعا بويىنشا تەكسەرۋ باستالعانىن حابارلادى. ميليسيا قىزمەتكەرلەرى جاعدايدى انىقتاپ، كىنالىلەردى ىزدەستىرۋدە.
فەدەراسيانىڭ ۇندەۋىنەن كەيىن الەۋمەتتىك جەلى قولدانۋشىلارى سپورتشىلارعا قولداۋ بىلدىرە باستادى. پىكىرلەردە كوپشىلىك كومانداعا جاڭا بيلەت الۋعا جانە مونعولياعا جەتۋگە كومەكتەسۋ ءۇشىن قاراجات جيناۋدى ۇسىنۋدا. باسقالارى ۇيىمداستىرۋ شىعىندارى نەگە مەملەكەتتىك ورگاندارعا ەمەس، سپورتشىلاردىڭ وزىنە تۇسكەنىن سۇراپ جاتىر.
ۆيسە-پرەزيدەنتتىڭ ايتۋىنشا، قۇراما 2 ملن سومعا (10 ملن تەڭگەدەن استام) الدانىپ قالعان.