قىتايدىڭ سىچۋان پروۆينسياسىندا بانكەت كەزىندە قابىرعا قۇلاپ، بەس ادام قازا تاۋىپ، تاعى 17 ادام جاراقات الدى، دەپ حابارلايدى infohub.kz.
وقيعا 18 تامىزدا چاننين ۋەزىنىڭ اۋىلىندا بولعان. Xinhua اگەنتتىگىنىڭ حابارلاۋىنشا، اپاتقا قابىرعاعا بەكىتىلگەن جاڭبىردان قورعايتىن ۋاقىتشا شاتىردا سۋدىڭ جينالۋى سەبەپ بولعان. ارتىق قىسىمنان قۇرىلىمدى ۇستاپ تۇرعان ارقاندار تارتىلىپ، قابىرعا قوناقتاردىڭ ۇستىنە قۇلاعان.
جەرگىلىكتى توتەنشە جاعدايلار باسقارماسىنىڭ مالىمەتىنشە، اۋىل تۇرعىنى اۋلاسىندا داستارقان جايعان. كەنەتتەن شاتىرعا تىرەك بولعان قابىرعا قۇلاپ، ءۇش ادام وقيعا ورنىندا قازا تاپقان، تاعى ەكەۋى اۋرۋحانادا العان جاراقاتىنان كوز جۇمعان.
ءقازىر 17 جاراقاتتانعان ادام دارىگەرلەردىڭ باقىلاۋىندا، ولارعا قاجەتتى مەديسينالىق كومەك كورسەتىلۋدە. جەرگىلىكتى بيلىك وقيعانىڭ ءمان-جايىن انىقتاپ جاتىر.