وتاندىق فارماسەۆتيكا نارىعىنا جاڭا شەتەلدىك ينۆەستيسيا تارتىلادى: وڭتۇستىككورەيالىق Kyungdong Pharmaceutical ينۆەستورى قازاقستاندا ءوز دارىلەرىن شىعارۋدى جولعا قويماق. بۇل تۋرالى infohub.kz سايتى حابارلايدى.
قازاقستان پرەزيدەنتى قاسىم-جومارت توقاەۆتىڭ كورەيا رەسپۋبليكاسىنا ساپارى اياسىندا دەنساۋلىق ساقتاۋ مينيسترلىگى Kyungdong Pharmaceutical كومپانياسىمەن ءوزارا تۇسىنىستىك تۋرالى مەموراندۋمعا قول قويدى.
قۇجات وزىق مەديسينالىق تەحنولوگيالاردى ترانسفەرتتەۋدى، كەلىسىمشارتتىق ءوندىرىستى جانە قازاقستان اۋماعىندا ءدارى شىعاراتىن بىرلەسكەن كاسىپورىندى كەزەڭ-كەزەڭىمەن ىسكە قوسۋدى كوزدەيدى.
دەنساۋلىق ساقتاۋ ءمينيسترى اقمارال ءالنازاروۆا Kyungdong Pharmaceutical باس ديرەكتورى كيم كون حۋنمەن جەكە كەلىسسوز جۇرگىزدى.
تاراپتار قازاقستاندا ءدارى ءوندىرىسىن جەرگىلىكتەندىرۋ، تەحنولوگيا ترانسفەرتى، كەلىسىمشارتتىق ءوندىرىس جانە بىرلەسكەن ينۆەستيسيالىق جوبالاردى جۇزەگە اسىرۋ پەرسپەكتيۆالارىن تالقىلادى.
Kyungdong Pharmaceutical — 1975 جىلى قۇرىلعان وڭتۇستىككورەيالىق فارماسەۆتيكالىق كومپانيا. ول رەسەپتىلىك جانە رەسەپتىسىز دارىلەر مەن بەلسەندى فارماسەۆتيكالىق ينگرەديەنتتەردى قوسا العاندا، كەڭ اۋقىمدى دارىلىك پرەپاراتتاردى ازىرلەۋمەن، وندىرۋمەن جانە ساتۋمەن اينالىسادى.
دەنساۋلىق ساقتاۋ مينيسترلىگىندە 2025 جىلدىڭ قورىتىندىسى بويىنشا قازاقستاننىڭ فارمنارىعىنىڭ كولەمى $2،5 ملرد بولعانىن، فارماسەۆتيكالىق ءونىم وندىرىسىنە سالىنعان ينۆەستيسيا $142،8 ملن-عا جەتكەنىن، ەكسپورت $84 ملن بولعانىن ەسكە سالدى.
بۇعان دەيىن «كۋرسيۆ» رەسپۋبليكادا تولىق سيكلدى جاڭا بيوفارماسەۆتيكالىق زاۋىت پايدا بولاتىنىن جازعان. ول الماتى وبلىسىنداعى «الاتاۋ» ارنايى ەكونوميكالىق ايماعىندا سالىنادى.