جەتىسۋ وبلىسىنداعى سارقان قالاسىنىڭ تۇرعىندارى اۋىز سۋدىڭ ساپاسىنا شاعىمدانۋدا. جاڭبىردان كەيىن سۋ قۇبىرىنان لاي سۋ اعىپ، ونى ىشۋگە جارامسىز دەپ وتىر، دەپ حابارلايدى infohub.kz.
قالا تۇرعىندارى سۋدى ۇلكەن ىدىستارعا قۇيىپ، تۇندىرۋعا ءماجبۇر ەكەندەرىن، ءبىراق سودان كەيىن دە ونىڭ جارامسىز ەكەنىن ايتادى. كوپشىلىك بوتەلكەدەگى سۋدى ساتىپ الۋدا.
وبلىس اكىمدىگى اۋدان ورتالىعىنىڭ سۋىن تاۋ مۇزدىقتارىنان قورەكتەنەتىن سارقان وزەنىنەن الاتىنىن ءتۇسىندىردى. جازدا 40–50 گرادۋس ىستىقتا سۋ دەڭگەيى كۇرت كوتەرىلىپ، بۇل لايلانۋعا اكەلەدى. سونىمەن قاتار سۋ تۇتىنۋ قىستا 5–6 مىڭ تەكشە مەتردەن جازدا 20–30 مىڭ تەكشە مەترگە دەيىن ارتىپ، سۋ تولىق تۇنىپ ۇلگەرمەيدى.
ماسەلەنى شەشۋ ءۇشىن 2024–2025 جىلدارى جۇمىستار جۇرگىزىلدى: باس سۋ الۋ قوندىرعىسى جوندەلدى، سۋ قابىلداۋ باسسەينى كەڭەيتىلدى، سۋ تارتۋ قۇبىرلارى اۋىستىرىلىپ، ۇلعايتىلدى، جاعالاۋ سىزىعى نىعايتىلدى، 1،2 شاقىرىم سۋ قۇبىرى جەلىسى جاڭارتىلدى، رەزەرۆۋار، شايما جۇيەسى جانە اۆاريالىق سۋ بۇرۋ جۇيەسى قايتا جاڭعىرتىلدى. سونداي-اق جالپى سىيىمدىلىعى 3750 تەكشە مەتر بولاتىن ءۇش تۇندىرعىش كۇردەلى جوندەۋدەن ءوتتى.
ۆەدومستۆو ماماندارى جاڭعىرتۋ تازارتۋ تيىمدىلىگىن وتكەن جىلدارمەن سالىستىرعاندا 70–80% دەيىن ارتتىرعانىن اتاپ ءوتتى. الايدا بيىلعى جازدا وزەندەگى سۋ دەڭگەيى 25 جىل ىشىندەگى ەڭ جوعارى مانگە جەتىپ، لايلىقتى كۇشەيتتى. تۇندىرعىشتاردى تازارتۋ جانە جەلىلەردى شايمالاۋ كەزىندە تۇرعىنداردا ۋاقىتشا لاي سۋ ساقتالۋى مۇمكىن.
اكىمدىك تۇندىرعىشتاردى تەرەڭدەتۋ، ارنانى كەڭەيتۋ جانە سۇزگى ستانسياسىن ورناتۋ ارقىلى ماسەلەنى تۇپكىلىكتى شەشۋدى جوسپارلاپ وتىرعانىن قوستى. وسى شارالاردان كەيىن اۋىز سۋدىڭ ساپاسى ايتارلىقتاي جاقسارۋى ءتيىس.