بۇگىن، 18 تامىزدا، شامامەن ءبىر ساعات بۇرىن جەرگە پلانەتارلىق اۋقىمداعى ماگنيتتىك داۋىل كەنەتتەن سوقتى، دەپ حابارلايدى infohub.kz سايتى.
عالىمداردىڭ مالىمەتىنشە، الەمدىك ماگنيتتىك وبسەرۆاتوريالار جەلىسى استانا ۋاقىتىمەن تاڭعى 9-10 شاماسىندا باستالعان گەوماگنيتتىك داۋىلدى تىركەدى. ازىرگە ول ءالسىز، امپليتۋداسى G1 دەڭگەيىندە.
"گەوماگنيتتىك احۋالدىڭ كۇردەلەنۋى الدىن الا كۇتىلگەن ەدى، ءبىراق عارىشتىق اۋا رايىنىڭ وزگەرىستەرى ءالسىز اۋىتقۋلار دەڭگەيىنەن اسپايدى دەپ ەسەپتەلگەن بولاتىن. شىنىن ايتقاندا، وسى ۋاقىتقا دەيىن ءدال سولاي بولاتىنداي كورىنگەن ەدى. پلانەتا ماڭىنداعى كۇن جەلىنىڭ پارامەترلەرى وسى ۋاقىت بويى تومەن ماندەردە ساقتالدى، ءتىپتى ولاردىڭ جەر ءورىسىن داۋىل دەڭگەيىنە دەيىن قالاي شايقاي العانى تۇسىنىكسىز"، - دەلىنگەن حابارلامادا.
زەرتحانادا تامىز ايى قازىرگى ۋاقىتتا وتە بەلسەندى اي بولىپ كورىنەتىنىن اتاپ ءوتتى - 18 كۇن ىشىندە ءۇشىنشى ماگنيتتىك داۋىل بولىپ وتىر، بۇل كۇن بەلسەندىلىگىنىڭ تومەن دەڭگەيىمەن ايتارلىقتاي قاراما-قايشىلىقتا. "دەگەنمەن، بايقالعان بارلىق داۋىلدار ازىرگە ورتاشا دەڭگەيدە بولدى جانە ولاردىڭ ەشقايسىسى 5 بالدىق شكالا بويىنشا G2 شەگىنەن اسپادى، مۇندا ەڭ جوعارى دەڭگەي - G5. اعىمداعى وقيعانىڭ ۇزاقتىعى قىسقا بولادى دەپ كۇتىلۋدە. بولجام بويىنشا، جەر ءورىسى تۇسكە تامان ءالسىز اۋىتقۋ كۇيىنە قايتا ورالادى. سونىمەن قاتار، احۋالدىڭ تولىق تۇراقتالۋىنا 2-3 تاۋلىك قاجەت بولۋى مۇمكىن"، - دەپ قوستى عالىمدار.
سونىمەن قاتار، جاريالانىمدا جەردىڭ ايتارلىقتاي ۇلكەن تاجدىك تەسىكتىڭ اسەر ەتۋ ايماعىندا ەكەندىگى، ال بۇل اسەر جويىلمايىنشا، قايتالاناتىن اۋىتقۋلار بولۋى مۇمكىن ەكەندىگى ايتىلادى.