ماڭعىستاۋ وبلىسىنداعى توتەنشە جاعدايعا بايلانىستى قازاقستان رەسپۋبليكاسى پرەمەر-مينيسترىنىڭ ورىنباسارى قانات بوزىمباەۆتىڭ توراعالىعىمەن ۇكىمەتتىك كوميسسيا وتىرىسى ءوتتى: كۇدىكتىلەر انىقتالىپ، قازا تاپقانداردىڭ وتباسىلارىنا قاجەتتى كومەكتىڭ بارلىعى كورسەتىلۋدە، دەپ حابارلايدى infohub.kz سايتى.
وتىرىستا العاشقى تەرگەۋ ءىس-شارالارىنىڭ ناتيجەلەرى، سونداي-اق بولعان وقيعانىڭ بارلىق سەبەپتەرى مەن ءمان-جايلارىن انىقتاۋعا قاتىستى كەلەسى قادامدار قارالدى.
ىشكى ىستەر ءمينيسترىنىڭ ورىنباسارى سانجار ءادىلوۆ بايانداعانداي، قازا تابۋ فاكتىسى بويىنشا قازاقستان رەسپۋبليكاسى قىلمىستىق كودەكسىنىڭ 453-بابىنىڭ 2-بولىگى («اۋىر زارداپتارعا اكەپ سوققان قىزمەتكە نەمقۇرايلى قاراۋ») جانە 465-بابى («كەمە جۇرگىزۋ ەرەجەلەرىن بۇزۋ») بويىنشا قىلمىستىق ىستەر قوزعالدى.
«تەرگەۋ اسكەريلەردىڭ قاۋىپسىزدىگىن قامتاماسىز ەتۋگە، وقۋ-جاتتىعۋلاردى ۇيىمداستىرۋعا جانە قۇتقارۋ ءىس-شارالارىن جۇرگىزۋگە بايلانىستى بۇزۋشىلىقتارعا جول بەرگەن لاۋازىمدى تۇلعالاردى انىقتادى. ولاردىڭ ارەكەتتەرىنە قۇقىقتىق باعا بەرىلۋدە»، – دەدى ءادىلوۆ.
وقيعادان كەيىن قۇتقارىلعان اسكەري قىزمەتشىنىڭ جاعدايى بولەك قارالدى. دەنساۋلىق ساقتاۋ ۆيسە-مينيسترى ماناس رامازانوۆ حابارلاعانداي، ونىڭ جاعدايى تۇراقتى، ومىرىنە ءقاۋىپ جوق. اسكەري قىزمەتشى ەسىن جيىپ، قاجەتتى مەديسينالىق كومەكتىڭ بارلىعىن الىپ جاتىر، ومىرىنە ەشقانداي ءقاۋىپ ءتونىپ تۇرعان جوق. قاسىندا اتا-اناسى بار.
وتىرىس بارىسىندا قازا تاپقاندار مەن زارداپ شەككەن اسكەريلەردىڭ وتباسىلارىنا جان-جاقتى قولداۋ كورسەتۋ جونىندە ناقتى تاپسىرمالار بەرىلدى. اتاپ ايتقاندا، تۇسەتىن قاراجاتتىڭ بارلىعىن ءبولۋدىڭ تولىق اشىقتىعىن قامتاماسىز ەتۋ تاپسىرىلدى. بۇل رەتتە ماتەريالدىق كومەك زاڭدا قاراستىرىلعان مەملەكەتتىك تولەمدەر مەن وتەماقىلاردى عانا ەمەس، بيزنەس وكىلدەرى مەن مەسەناتتار تاراپىنان كورسەتىلەتىن قارجىلىق قولداۋدى دا قامتيدى.
وسى قاراجاتتى جيناقتاۋ ءۇشىن ماڭعىستاۋ وبلىسىنىڭ اكىمدىگى ارنايى قور انىقتادى، ونىڭ قىزمەتى تۇراقتى باقىلاۋعا الىندى.