ماڭعىستاۋ وبلىسىندا اۆاريالىق تۇرعىن ءۇي قورىن جاڭارتۋ جانە ازاماتتاردى ءقاۋىپسىز باسپانامەن قامتاماسىز ەتۋ جۇمىستارى بەلسەندى جۇرگىزىلۋدە. جوبا مەملەكەتتىك-جەكەشەلىك ارىپتەستىك اياسىندا ىسكە اسىرىلۋدا، دەپ حابارلايدى infohub.kz سايتى.
ماڭعىستاۋ وبلىسىنىڭ اكىمى نۇرداۋلەت قيلىباي جاڭاوزەن قالاسىنداعى، سونداي-اق بەينەۋ جانە قاراقيا اۋداندارىنداعى اۆاريالىق ۇيلەردى جاڭعىرتۋ جوبالارىمەن تانىستى. 2025 جىلدىڭ قورىتىندىسى بويىنشا وڭىردە 61 اۆاريالىق ءۇي بار، ولاردى كەزەڭ-كەزەڭىمەن جاڭارتىپ، تۇرعىنداردى ءقاۋىپسىز باسپاناعا كوشىرۋ جوسپارلانۋدا.
جاڭاوزەندە ۆوكزال، شاڭىراق جانە شۇعىلا شاعىن اۋداندارىنداعى 322 پاتەردى قامتيتىن 25 اۆاريالىق ءۇيدى جاڭارتۋ كوزدەلگەن. تۇرعىندار جاڭا ۇيلەرگە كوشىرىلىپ، ەسكى عيماراتتار بۇزىلادى. ولاردىڭ ورنىنا زاماناۋي ينجەنەرلىك ينفراقۇرىلىمى مەن اباتتاندىرىلعان 180 جانە 160 پاتەرلىك جاڭا ۇيلەر سالىنادى.
بەينەۋ اۋدانىندا 17 اۆاريالىق ءۇي بار: بورانقۇل اۋىلىندا 12، ەسەتتە 2، اقجىگىتتە 2 جانە تولەپتە 1. بورانقۇل مەن ەسەت تۇرعىندارىن كوشىرۋ ءۇشىن جاڭا ۇيلەر سالىنسا، اقجىگىت پەن تولەپتە بۇزۋ جۇمىستارى جۇرگىزىلەدى.
قاراقيا اۋدانىندا مۇنايشى اۋىلىنىڭ تەمىرجولشى جانە سالتانات شاعىن اۋداندارىنداعى 15 اۆاريالىق ءۇيدى جاڭارتۋ جوسپارلانۋدا. تۇرعىنداردى كوشىرۋ ءۇشىن 336 پاتەرلىك 5 كوپپاتەرلى تۇرعىن ءۇي سالىنادى.
ءۇش اۋماقتاعى جاڭا ۇيلەردىڭ جالپى اۋدانى 53 مىڭ شارشى مەتردەن اسادى. قۇرىلىس 2027 جىلى باستالىپ، 2029 جىلى اياقتالادى.
وبلىس اكىمى اۆاريالىق ءۇي تۇرعىندارىن ءقاۋىپسىز باسپانامەن قامتاماسىز ەتۋ ءوڭىردىڭ ماڭىزدى مىندەتتەرىنىڭ ءبىرى ەكەنىن اتاپ ءوتتى. «مەملەكەت باسشىسى حالىقتىڭ ءومىر ءسۇرۋ ساپاسىن ارتتىرۋعا، ازاماتتاردى ءقاۋىپسىز ءارى جايلى باسپانامەن قامتاماسىز ەتۋگە ەرەكشە نازار اۋدارادى. ءبىز اۆاريالىق ۇيلەر ماسەلەسىن جۇيەلى تۇردە شەشۋىمىز كەرەك. بۇل رەتتە تۇرعىنداردى كوشىرۋ، جاڭا ۇيلەر سالۋ جانە ەسكى نىسانداردى بۇزۋ جۇمىستارى ءوزارا بايلانىستى جانە ناقتى جوسپارعا سايكەس جۇرگىزىلۋى ءتيىس. ەڭ باستىسى — قۇرىلىس ساپاسى مەن مەرزىمدەرىن قاتاڭ ساقتاۋ، تۇرعىنداردىڭ قۇقىقتارى مەن مۇددەلەرىن ەسكەرۋ. ءار جوبا بويىنشا جۇمىستاردى تۇراقتى باقىلاۋدا ۇستاۋ قاجەت»، — دەدى نۇرداۋلەت قيلىباي.
ساپار قورىتىندىسى بويىنشا اكىم جاۋاپتى ورگاندارعا دايىندىق جۇمىستارىن جەدەلدەتىپ، جوبالاردىڭ بەلگىلەنگەن مەرزىمدە ساپالى ىسكە اسىرىلۋىن قامتاماسىز ەتۋدى تاپسىردى.