فۋتبول تاريحىنداعى ەڭ داۋلى گولداردىڭ ءبىرىن ديەگو مارادونا سوققان اڭىزعا اينالعان دوپ اۋكسيوندا 3،3 ميلليون دوللارعا (1،51 ميلليارد تەڭگە) ساتىلدى. بۇل — 1986 جىلعى الەم چەمپيوناتىنىڭ شيرەك فينالىندا ارگەنتينا مەن انگليا اراسىنداعى ماچتا قولدانىلعان Adidas Azteca دوپى، دەپ حابارلايدى infohub.kz.
بۇل ماچ مارادونانىڭ كارەراسىنداعى ەڭ اتاقتى ويىنداردىڭ ءبىرى بولدى. 51-مينۋتتا ول قولىمەن گول سوقتى، ءبىراق ەرەجە بويىنشا بۇل گول ەسەپتەلمەۋى كەرەك ەدى. تورەشى بۇزۋشىلىقتى بايقاماي، گولدى ەسەپتەدى. ويىننان كەيىن مارادونانىڭ ءوزى ك ۇلىمسىرەپ: «بۇل — مارادونانىڭ باسى مەن قۇدايدىڭ قولى» دەپ پىكىر ءبىلدىردى.
بىرنەشە مينۋتتان كەيىن ارگەنتينالىق ويىنشى دۋبل جاساپ، كەيىن «عاسىردىڭ گولى» دەپ اتالعان گولدى سوقتى. مارادونا دوپتى الاڭنىڭ جارتىسىنان وتكىزىپ، اعىلشىننىڭ بەس ويىنشىسىن اينالىپ ءوتىپ، قاقپاشىنى دا باسىپ وزدى. ناتيجەسىندە ارگەنتينا ماچتا 2:1 ەسەبىمەن جەڭىسكە جەتتى.
فينالدىق ىسقىرىقتان كەيىن تۋنيستىك تورەشى ءالي بين ناسسەر دوپتى وزىنە الىپ، 30 جىلدان استام ۋاقىت ساقتادى. 2023 جىلى ول ءدال وسى Adidas Azteca دوپىنىڭ ماچتا قولدانىلعان جالعىز دوپ ەكەنىن جازباشا راستادى. كەيىن ونىڭ ءتۇپنۇسقالىعىن تاۋەلسىز ساراپشىلار دا راستادى.
بين ناسسەر دوپتى العاش رەت 2022 جىلى اۋكسيونعا قويىپ، ول 2،37 ميلليون دوللارعا (1 ميلليارد تەڭگەدەن ءسال استام) ساتىلدى. جاڭا يەسى 2023 جىلى ونى قايتا ساتۋعا تىرىستى، ءبىراق ساۋدا-ساتتىق ءساتسىز اياقتالدى: قاتىسۋشىلار ەڭ تومەنگى باعانى ۇسىنبادى.
بۇل جولى دوپ تاعى دا 3،3 ميلليون دوللارعا ساتىلدى. دەگەنمەن كۇتۋ الدەقايدا جوعارى بولدى: ماماندار شامامەن 10 ميلليون دوللار (4،5 ميلليارد تەڭگە) جينالادى دەپ بولجاعان.
سالىستىرۋ ءۇشىن، مارادونانىڭ سول ماچتا كيگەن جەيدەسى 2022 جىلى اۋكسيوندا 9،6 ميلليون دوللارعا (4،4 ميلليارد تەڭگە) ساتىلعان ەدى.
بۇعان دەيىن مارك حەميلل «جۇلدىزدار سوعىسى: يمپەريا شابۋىل جاسايدى» ءفيلمىنىڭ تۇسىرىلىمىندە قولدانعان ليۋك سكايۋوكەردىڭ ءتۇپنۇسقا جارىق قىلىشى اۋكسيوندا رەكوردتىق 3،75 ميلليون دوللارعا (1،7 ميلليارد تەڭگەدەن ءسال استام) ساتىلعانى حابارلانعان بولاتىن.