سولتۇستىك قازاقستان وبلىسىندا قاشىقتىقتان جاسالعان الاياقتىق تۋرالى قىلمىستىق ءىس بويىنشا سوت ۇكىمى شىقتى. infohub.kz سايتىنىڭ حابارلاۋىنشا، قىلمىسكەرلەر پەتروپاۆل تۇرعىنىنا قوڭىراۋ شالىپ، وزدەرىن بانك قىزمەتكەرلەرى رەتىندە تانىستىرىپ، ونىڭ شوتتارىنا بوگدە ادامداردىڭ قول جەتكىزگەنىن ايتقان. اقشانى قورعاۋ سىلتاۋىمەن الاياقتار ەر ادامدى نەسيە راسىمدەپ، اقشانى كورسەتىلگەن شوتقا اۋدارۋعا كوندىرگەن.
وسىدان كەيىن قىلمىستىق سحەماعا قاتىسۋشىلاردىڭ ءبىرى پاۆلوداردا بانكومات ارقىلى جابىرلەنۋشىگە تيەسىلى 2 ميلليون 860 مىڭ تەڭگەنى قولما-قول الىپ، ونى كريپتوۆاليۋتاعا ايىرباستاپ، ءبىر بولىگىن وزىنە سىياقى رەتىندە قالدىرعان. بەتىن مەديسينالىق ماسكا مەن كەپكامەن جاسىرىپ، بانكومات الدىنداعى بەينەكامەرالاردان قۇتىلۋعا تىرىسقان.
الايدا بۇل ايلا-شارعىلار كومەكتەسپەدى. تەرگەۋ بارىسىندا پوليسيا قىزمەتكەرلەرى كۇدىكتىنىڭ جەكە باسىن انىقتادى — ول پاۆلودار وبلىسىنىڭ 21 جاستاعى تۇرعىنى بولىپ شىقتى. سوت ونىڭ «قولما-قول اقشا الۋشى» ءرولىن سانالى تۇردە ورىنداعانىن انىقتادى. مامىر ايىنىڭ سوڭىندا جاريالانعان ۇكىم امنيستياعا بايلانىستى جەڭىلدەتىلدى — سوتتالۋشىعا ءبىر جىل باس بوستاندىعىن شەكتەۋ جازاسى تاعايىندالدى. سونىمەن قاتار، سوت ونى جابىرلەنۋشىگە كەلتىرىلگەن 2 ملن 790 مىڭ تەڭگە كولەمىندەگى زالالدى وتەۋگە مىندەتتەدى. ۇكىم زاڭدى كۇشىنە ەندى.