قازاقستان دەنساۋلىق ساقتاۋ مينيسترلىگى مەديسينالىق ۇيىمداردىڭ جۇمىس ساپاسىن باعالاۋدىڭ جاڭا ەرەجەلەرىنىڭ جوباسىن قوعامدىق تالقىلاۋعا ۇسىندى. قۇجات ەمحانالار باسشىلارىنىڭ دارىگەرلىك قاتەلىكتەر ءۇشىن جاۋاپكەرشىلىگىن كۇشەيتۋدى جانە پاسيەنتتەردى قولداۋ قىزمەتتەرىن جاڭعىرتۋدى كوزدەيدى، دەپ حابارلايدى infohub.kz سايتى.
اشىق نورماتيۆتىك قۇقىقتىق اكتىلەر پورتالىندا جاريالانعان جوبانىڭ نەگىزگى باعىتتارىنىڭ ءبىرى – مەديسينالىق مەكەمەلەردەگى پاسيەنتتى قولداۋ قىزمەتى مەن ىشكى ساراپتاما جۇمىسىن جەتىلدىرۋ.
سونىمەن قاتار، قۇجات مەملەكەتتىك باقىلاۋ قورىتىندىسى بويىنشا ورەسكەل بۇزۋشىلىقتار انىقتالعان جاعدايدا مەديسينا قىزمەتكەرلەرى مەن ۇيىم باسشىلارىن اتتەستاسيالاۋ ءتارتىبىن ناقتىلايدى. جوبادا «ورەسكەل بۇزۋشىلىقتاردىڭ» ناقتى كريتەريلەرى كورسەتىلمەگەن.
«وزگەرىستەر بەلگىلەنگەن تالاپتاردىڭ ساقتالۋىنا جاۋاپكەرشىلىكتى ارتتىرۋعا جانە مەديسينالىق ۇيىمداردىڭ جۇمىس ساپاسىن باعالاۋدىڭ ءبىرىڭعاي تاسىلدەرىن قامتاماسىز ەتۋگە باعىتتالعان»، – دەلىنگەن جوبانىڭ نەگىزدەمەسىندە.
ۆەدومستۆونىڭ مالىمدەۋىنشە، ۇسىنىلىپ وتىرعان شارالار مەديسينالىق كومەك ساپاسىن جاقسارتۋعا جانە پاسيەنتتەردىڭ قۇقىقتارىن قورعاۋ ءۇشىن مەملەكەتتىك رەتتەۋدى جەتىلدىرۋگە ارنالعان. سونىمەن بىرگە ازاماتتار ءۇشىن مەديسينالىق كومەك الۋدىڭ كولەمى مەن ەرەجەلەرى بۇرىنعىسىنشا قالادى.
بۇيرىق جوباسىن تالقىلاۋ 2026 جىلدىڭ 11 تامىزىنا دەيىن سوزىلادى.
بۇعان دەيىن دەنساۋلىق ساقتاۋ مينيسترلىگى انالار مەن نارەستەلەردى اۋرۋحاناىشىلىك ينفەكسيالاردان قورعاۋ ماقساتىندا بۇكىل ەل بويىنشا پەريناتالدىق ورتالىقتارعا اۋقىمدى تەكسەرۋ جۇرگىزەتىنى بەلگىلى بولعان ەدى. ۆەدومستۆو تەكسەرۋلەردىڭ ماقساتى جازالاۋ ەمەس، قاۋىپتەردىڭ الدىن الۋ جانە سانيتارلىق نورمالاردىڭ ءاۋديتى ەكەنىن اتاپ ءوتتى.
سونداي-اق، بۇرىن قازاقستاننىڭ توتەنشە ىستىقتىڭ جۇكتى ايەلدەر مەن سابيلەرگە اسەرىن زەرتتەۋ جوسپارى تۋرالى حابارلانعان بولاتىن.